Zaxarova: Ermənistandakı seçkilər müxalifətə təzyiq mühitində keçib

Rusiya Xarici İşlər Nazirliyinin rəsmi nümayəndəsi Mariya Zaxarova Ermənistanda baş tutan seçkilərin nəticələrini şərh edib.

Bizim.Media xəbər verir ki, Rusiya rəsmisi seçki prosesinin müxalifətə qarşı görünməmiş təzyiqlər və Qərbin müdaxiləsi fonunda keçdiyini bildirib.

Zaxarova açıqlamasında bir sıra digər mühüm məqamları diqqətə çatdırıb.

Rusiya XİN rəsmisinin sözlərinə görə, seçkilərin nəticələrinə əsasən, Baş nazir Nikol Paşinyanın rəhbərlik etdiyi "Mülki Müqavilə" partiyasına olan dəstək nəzərəçarpacaq dərəcədə azalıb:

“Keçirilən seçkilər Ermənistan cəmiyyətinin kəskin şəkildə qütbləşdiyini əyani şəkildə nümayiş etdirib.
 

Ermənistan cəmiyyətində Rusiya ilə əlaqələrin inkişaf etdirilməsinə və ölkənin Aİİ-də qalmağa davam etməsinə dair geniş bir tələb (istək) mövcuddur.

Rusiya rəsmi İrəvanla bağlı gələcək xəttini Ermənistan rəhbərliyinin atacağı real addımları nəzərə alaraq formalaşdıracaq”.

Zaxarova Moskvanın hər zaman güclü və həqiqi suveren Ermənistanda maraqlı olduğunu vurğulayıb.

Sonda Mariya Zaxarova Ermənistan xalqının Rusiya üçün qardaş xalq olduğunu qeyd edərək, onlara sülh və rifah arzuladıqlarını bildirib.

Bizim.Media