Avropa ölkələri ABŞ Prezidenti Donald Trampın Vaşinqtonun NATO-dakı rolunu azaltmaq və ya ölkəsini alyansdan çıxarmaq ehtimalı fonunda ehtiyat müdafiə planı üzərində işləyir.
Bizim.Media xəbər verir ki, bu barədə The Wall Street Journal yazıb.
Nəşrin məlumatına görə, məqsəd alyansı daha çox Avropaya söykənən formata keçirməkdir. Bu model qeyri-rəsmi şəkildə “Avropa NATO-su” da adlandırılır.
Məlumata əsasən, plan Avropanın ABŞ dəstəyi olmadan da özünü müdafiə edə bilməsinə hesablanıb. Bunun üçün NATO daxilində komanda-idarəetmə və rəhbər vəzifələrdə daha çox avropalının irəli çəkilməsi, eləcə də Amerika hərbi texnikasından asılılığın azaldılması nəzərdə tutulur.
WSJ yazır ki, bu ehtiyat planı üzərində işə 2025-ci ildə başlanılıb, lakin proses Trampın NATO ilə bağlı sərt açıqlamalarından və son aylarda ABŞ-ın alyansa münasibəti ilə bağlı yaranan qeyri-müəyyənlikdən sonra sürətlənib.
Nəşr xüsusilə Almaniyanın mövqeyində dəyişiklik olduğunu və kansler Fridrix Mertsin rəhbərliyi altında Avropanın müdafiə muxtariyyətinə daha açıq yanaşdığını vurğulayır.
Eyni zamanda, planın qarşısında ciddi çətinliklər də var. ABŞ-ın təmin etdiyi kəşfiyyat, nüvə çəkindirməsi, havada yanacaq doldurma, uzaqmənzilli logistika və digər kritik imkanların Avropa tərəfindən tam şəkildə əvəzlənməsi asan görünmür. Bu səbəbdən məqsəd NATO-nu ləğv etmək yox, ABŞ zəifləsə belə, alyansın Avropa sütununu gücləndirməkdir.
Beləliklə, “B planı” Avropanın NATO-dan imtina etməsi deyil. Söhbət, əksinə, ABŞ-ın mümkün geri çəkilməsi halında alyansın Avropa dayaqları üzərində işləməyə davam etməsi üçün alternativ model hazırlanmasından gedir.
Bizim.Media
