İsgəndər Həmidov Rəsul Quliyevdən danışdı

Yaranmasından heç bir ay ötməmiş daxilindəki qarşıdurma üzündən Milli Şura çətin sınaq qarşısında qalıb və hətta bir çoxları bu cür intriqaların, didişmələrin qurumun iflasına gətirib çıxaracağını iddia edirlər. Eks-spiker Rəsul Quliyevin Müsavat başqanı İsa Qəmbəri ittiham etməsinə Arif Hacılının cavabından sonra yaşanan söz atışmasının aşkar təhqirə keçməsi ondan xəbər verir ki, doğrudan da Milli Şura ən yumşaq halda “mehriban düşmənlər” ittifaqıdır və bu cür kövrək tellərlə formalaşmış bu qurum hər an dağıla bilər. 

Milli Şuranın üzvü, keçmiş daxili işlər naziri İsgəndər Həmidov da yaşananlardan üzülür. Moderator.az-a açıqlamasında eks nazir bildirdi ki, indiki həssas dönəmdə müxalifətdə kimlərinsə bir- birini ittiham etməsini və bu adamların nəyə xidmət etdiyini anlamaqda çətinlik çəkir:

“Maraqlı və maraqlı olduğu qədər də acınacaqlıdır. Axı dünənədək onlar bir yerdə idilər. İstər Rəsul Quliyev, istərsə də İsa Qəmbər Milli Şurada təmsil olunurlar. Nə baş verdi ki, bu cür yersiz dartışmaya rəvac verib könül bulandırırlar?”

Fürsətdən istifadə edərək İ. Həmidovdan Cəbhə hakimiyyəti dönəmində onun guya Rəsul Quliyevi həbs etmək üçün prezident Elçibəydən icazə istədiyi barədə dolaşan fikirlərə də aydınlıq gətirməsini istədik və onun həmin vaxt Arif Hacılının iddia etdiyi kimi mafioz kimi qəbul edilib-edilmədiyini soruşduq:

“O vaxt Rəsul Quliyev zavod direktorluğundan Azneft-ə müavin gəldi, qısa vaxtdan sonra da ordan baş nazirə müavin gətirildi. Təqdimatı konkret kimin hazırladığını bilmirəm, ancaq prezidentin fərmanıyla həmin posta gətirildi. O zaman onun direktor olduğu zavodla bağlı müəyyən məlumatlar vardı, ancaq konkret onun adı hansısa cinayət işində hallanmırdı. Bu gün onun bir mafioz kimi təqdim edilməsi də doğru deyil və şəxsən məndə onun mafioz olduğuyla bağlı hər hansı konkret fakt yox idi.”