Sabah Ankarada TDT Xarici İşlər Nazirləri Şurasının iclası keçiriləcək

Xəbər verdiyimiz kimi, Türk Dövlətləri Təşkilatının (TDT) XIII Liderlər Sammiti  30 oktyabr 2026-cı il tarixində Türkiyə Prezidenti Rəcəb Tayyib Ərdoğanın ev sahibliyi ilə Ankarada keçiriləcək. Türkiyənin xarici işlər naziri Hakan Fidanın sədrliyi ilə isə sabah TDT Xarici İşlər Nazirləri Şurasının iclası baş tutacaq.

Bizim.Media xəbər verir ki, iclasda türk dövlətləri arasında əməkdaşlığın inkişaf etdirilməsi, təşkilatın institusional strukturunun gücləndirilməsi və regional hadisələrin müzakirəsi gözlənilir.

Türkiyə Xarici İşlər Nazirliyinin mənbələrinin məlumatına görə, Fidan çıxışında TDT çərçivəsində türk dövlətləri arasında siyasi dialoqun və birgə fəaliyyət imkanlarının gücləndirildiyinə diqqət çəkəcək.

Onun ortaq tarix, dil, mədəniyyət və qardaşlıq bağlarının konkret əməkdaşlıq layihələrinə çevrilməsinin vacibliyini vurğulaması gözlənilir.
 

Türkiyənin TDT-yə sədrliyi dövründə prioritet veriləcək məsələlər də iclasın gündəliyində yer alacaq. Bu çərçivədə təşkilatın institusional imkanlarının artırılması, Katibliyin insan resurslarının və maliyyə imkanlarının genişləndirilməsi, eləcə də türk əməkdaşlıq qurumları arasında koordinasiyanın gücləndirilməsi hədəflənir.

İclasın əsas mövzularından birini türk dövlətləri arasında iqtisadi və strateji əməkdaşlıq təşkil edəcək.

Fidanın enerji, ticarət, investisiyalar, rəqəmsal transformasiya və müdafiə sənayesi sahələrində həyata keçirilən işlərin konkret nəticələrə çevrilməsinin vacibliyini vurğulaması gözlənilir.

Xüsusilə Xəzərdən keçən Orta Dəhlizin gücləndirilməsi Asiya ilə Avropa arasında nəqliyyat və ticarət əlaqələrinin inkişafı baxımından prioritet məsələlər sırasındadır. Türkiyənin bu marşrut vasitəsilə regional bağlantıların və iqtisadi dayanıqlığın artırılmasına verdiyi əhəmiyyətin də iclasda qeyd olunacağı gözlənilir.

Xarici işlər naziri Hakan Fidanın çıxışında Əfqanıstandakı hadisələrə də yer ayırması gözlənilir.

Əfqanıstandakı vəziyyətin regional təhlükəsizlik, sabitlik və nəqliyyat əlaqələrinə təsirlərinə diqqət çəkəcəyi gözlənilən Fidanın TDT-yə üzv və müşahidəçi ölkələr arasında bu məsələ ilə bağlı məsləhətləşmələrin və koordinasiyanın artırılmasının vacibliyini vurğulaması planlaşdırılır.
 

Xarici İşlər Nazirləri Şurasının iclasında TDT-nin institusional inkişafı ilə bağlı görülən işlər də qiymətləndiriləcək. Təşkilatın fəaliyyəti ilə əlaqədar bəzi inzibati və maliyyə sənədlərinin təsdiqlənməsi məsələsi də gündəmdə olacaq.

Hakan Fidanın iclas çərçivəsində həmkarları ilə ikitərəfli görüşlər keçirməsi də planlaşdırılır.
Ankarada keçiriləcək XIII TDT Sammiti “Türk əsri: Dildə, fikirdə, işdə birlik” mövzusu altında təşkil olunacaq.

Sammitin mövzusunun Prezident Rəcəb Tayyib Ərdoğanın “Türk dünyası əsri” baxışı və İsmayıl bəy Qaspıralının birlik anlayışından ilhamlanaraq müəyyən edildiyi bildirilir.

Oktyabrın 29-da keçiriləcək iclasla TDT xarici işlər nazirləri 2026-cı il ərzində Şura səviyyəsində beşinci dəfə bir araya gələcəklər. Bu görüşlərdən biri adi, dördü isə qeyri-rəsmi formatda keçirilib.

Görüşlərin Ankarada keçiriləcək liderlər zirvəsindən əvvəl əməkdaşlıq gündəliyini nəzərdən keçirmək imkanı yaradacağı gözlənilir.

Türk Dövlətləri Təşkilatının üzvləri kimlərdir?

Türk Dövlətləri Təşkilatı 3 oktyabr 2009-cu ildə Türkiyə, Azərbaycan, Qazaxıstan və Qırğızıstan arasında imzalanmış Naxçıvan Sazişi əsasında Türkdilli Dövlətlərin Əməkdaşlıq Şurası adı ilə yaradılıb. 2021-ci ildə İstanbulda keçirilən Zirvədə qəbul edilən qərarla təşkilatın adı Türk Dövlətləri Təşkilatı olaraq dəyişdirilib.

Mərkəzi İstanbulda yerləşən TDT-nin beş üzvü var: Türkiyə, Azərbaycan, Qazaxıstan, Qırğızıstan və Özbəkistan.

Macarıstan, Türkmənistan, Şimali Kipr Türk Respublikası və İqtisadi Əməkdaşlıq Təşkilatı müşahidəçi statusuna malikdir.

Təşkilat türk dövlətləri arasında siyasi həmrəyliyin gücləndirilməsini, iqtisadi və texniki əməkdaşlığın inkişaf etdirilməsini, ortaq tarixi və mədəni irsin qorunmasını hədəfləyir.

Bizim.Media