“Qış yumurtası” rekord qiymətə hərraca ÇIXARILDI - FOTO

Sonuncu Rusiya imperatoru II Nikolayın kolleksiyasından olan "qış yumurtası" “Faberge” Londonda hərraca çıxarılıb.

Bizim.Media xəbər verir ki, bu barədə “Christie's” hərrac evi məlumat yayıb.

"4000-dən çox brilyantla bəzədilmiş və mürəkkəb oyma ağ kvars meşə anemonlarını üzə çıxarmaq üçün açılan “qış yumurtası” “Faberge” Evi tərəfindən yaradılan ən dəbdəbəli işlərdən biridir. O, dekabrın 2-də Londonda hərraca çıxarılacaq", - məlumatda deyilir.
 

Qeyd edək ki, yumurta qaya kristalından hazırlanıb və platinlə işlənmiş zərif qar dənəciyi naxışı ilə örtülüb. O, II Nikolay tərəfindən 1913-cü ildə Pasxa hədiyyəsi olaraq anası Mariya Fedorovna üçün sifariş edilmişdi.

Bu yumurtanın qiymətinin 2007-ci ildə “Christie's”də Rotşildlər ailəsi üçün yaradılmış başqa bir “Faberge” yumurtası üçün qoyulmuş 18,5 milyon dollarlıq rekordu ötəcəyi gözlənilir. Onun 26 milyon dollara satılacağı ehtimal edilir.