Fifa prezidentliyinə namizəd olacaq

Yaponiya Futbol Assosiasiyasının keçmiş prezidenti və hazırkı fəxri prezidenti Kodzo Tasima FİFA prezidenti vəzifəsinə namizədliyini irəli sürmək qərarına gəlib.

Bizim.Media xəbər verir ki, təşkilat rəhbəri vəzifəsi uğrunda seçkilər 2027-ci ilin martında keçiriləcək. İndiyədək bu vəzifəyə yalnız hazırkı prezident Canni İnfantino namizədliyini açıqlamışdı.

Tasima Yaponiya Futbol Assosiasiyasının tam dəstəyini aldıqdan sonra bu qərarı verdiyini bildirib:

“Bu açıqlamanı vermək imkanına görə minnətdaram. Üstəlik, Yaponiya Futbol Assosiasiyasının tam dəstəyinə sahibəm. Söhbət qələbə və ya məğlubiyyətdən getmir.

Məqsədimiz bütün dünyaya Yaponiya futbolunun təməlini təşkil edən dürüstlük, etibarlılıq və prinsipiallıq kimi dəyərləri nümayiş etdirməkdir.

Əminəm ki, məhz bizim hər zaman müdafiə etdiyimiz bu dəyərlər hazırda FİFA üçün vacibdir. Bu prinsipləri dünya futbol ictimaiyyətinə çatdırmaq məqsədilə FİFA prezidentliyinə namizədliyimi irəli sürmək qərarına gəlmişəm”.

Bizim.Media