Sakinlər meyxanaçılardan şikayət etdi: "Gecə 2-yə qədər yata bilmirik" – VİDEO

Abşeron rayonunun Masazır qəsəbəsində fəaliyyət göstərən restoranlardan birində gecə saatlarında yüksək səslə musiqi səsləndirilməsi sakinlərin narazılığına səbəb olub.

Bizim.Media Baku TV-yə istinadən xəbər verir ki, səsin ətrafdakı yaşayış evlərinə yayıldığı və insanların istirahətinə mane olduğu bildirilib.
 

Şikayət edən vətəndaşlar qeyd ediblər ki, bəzi hallarda musiqi və meyxana gecə saat 2-yə qədər davam edir.

Çəkiliş zamanı məkanda olan meyxanaçı Namiq Məna məsələ ilə bağlı açıqlama verib. O, saat 23:00-dan sonra musiqinin səsinin azaldıldığını desə də, məkandakı yüksək səs ətrafda aydın eşidilib.

O, ətrafdakı yaşayış evlərinə səsin yayılması ilə bağlı iradları da nəzərə alacaqlarını bildirib:

“İndi səs keçirməyən pəncərələr var. Həmin pəncərələri ala bilməyənlərdən üzr istəyirik. Qanuna hamımız riayət etməliyik. Şikayətləri nəzərə alarıq”.


Bizim.Media