“Tənqidi fikirlərinə görə kimisə məhkəməyə verməyin özü qanunsuzluqdur”

Azərbaycan Ziyalılar Birliyinin sədri, Milli Şura üzvü Eldəniz Quliyevin daxili işlər naziri Ramil Usubov tərəfindən xüsusi ittiham qaydasında məhkəməyə verilməsi cəmiyyətdə, xüsusilə də ictimai-siyasi sferada ciddi rezonansa səbəb olub. Baş verənlərə münasibət bildirən bir çox siyasilər E.Quliyevin facebook səhifəsində bəzi dövlət yol polisi əməkdaşlarının qüsurlu fəaliyyətini tənqid etməsi səbəbi ilə R.Usubov tərəfindən məhkəməyə verilməsini tamamilə əsassız hesab edir. E.Quliyevin həm də Milli Şura üzvü olduğuna diqqət çəkən bəzi siyasilər isə Azərbaycan Ziyalılar Birliyinin sədrinə qarşı irəli sürülən ittihamı Milli Şuraya qarşı təzyiq vasitəsi kimi qiymətləndirməkdədir.

Baş verənlər müstəqil hüquqşünaslar tərəfindən də sərt şəkildə tənqid edilməkdədir. Moderator.az-a açıqlamasında məsələyə münasibət bildirən hüquqşünas Müzəffər Baxışov yol polisi haqqında səsləndrilən ümumi tənqidi fikirlərə görə E.Quliyevin məhkəməyə verilməsinin qeyri-qanuni olduğunu, normal, sivil dövlətlərdə belə bir olayın baş verməsinin mümkünsüz olduğunu vurğuladı:

“Yol polisinin hansı vəziyyətdə olduğu hər kəsə bəllidir. Müzəffər Baxışovun nə deməyindən asılı olmayaraq bu, hər kəsə bəlli olan bir həqiqətdir. Ümumi sözlərə və tənqidi çıxışlara görə kimisə xüsusi ittiham qaydasında məhkəməyə verməyin özü qanunsuzluqdur. Əgər ictimai-siyasi xadim bu və ya digər sahədə olan bir məsələni, fəaliyyəti tənqid erdirsə, oradakı nöqsanlara toxunursa, bu nöqsanların həll edilməsinin zəruriliyini dilə gətirirsə, bu hallara qarşı mübarizə aparmağın vacibliyini qeyd edirsə, o zaman Azərbaycan Respublikasının daxili işlər nazirinin həmin şəxsi xüsusi ittiham qaydasında məhkəməyə vermək səlahiyyəti yoxdur”.

M.Baxışovun fikrincə, əslində hakim Azərbaycan Respublikasının qanunvericiliyindəki müvafiq müddəaları əsas tutaraq həmin iddianı öz icraatına götürməkdən imtina etməli idi: “Burada nə böhtan, nə də təhqir var. Çünki orada ümumi ifadələr işlədilib. Konkret şəxslər haqqında heç nə deyilməyib. Sadəcə müəyyən bir sahə tənqid edilib. Əgər Azərbaycanda normal bir hüquq dövləti olsaydı, o zaman bu iddia məhkəmə icraatına qəbul edilməzdi. Lakin bu inandırıcı deyil ki, daxili işlər naziri xüsusi ittiham qaydasında məhkəməyə müraciət etsin və məhkəmə, hakim də özündə cəsarət taparaq, Azərbaycan Respublikasının qanunvericiliyinin müddəlarını rəhbər tutaraq həmin ərizəni öz icraatına qəbul etməsin. Məlum olduğu kimi hakim bu iddianı öz icraatına qəbul edib. Normal dövlətlərdə kimisə bu cür tənqidi fikirlərinə görə xüsusi ittiham qaydasında məhkəməyə vermək mümkün deyil. Çünki orada konkret şəxslər haqqında fikirlər yürüdülmür”.

Seymur Əliyev