Qurmanların diqqətinə: Dünyanın ən dadlı və münasib qiymətli yeməkləri olan 20 şəhəri

Məşhur "Time Out" jurnalı səyahətçilər və qurmanlar üçün dünyanın 20 ən yaxşı qastronomiya şəhərinin illik reytinqini dərc edib. Siyahının tərtib edilməsi üçün dünyanın 150 şəhərində 24 min yerli sakin arasında sorğu keçirilib, restoran və küçə yeməklərinin keyfiyyəti, qiymətlərin münasibçiliyi və ümumi kulinariya mədəniyyəti qiymətləndirilib. Qaydalara əsasən, hər ölkədən yalnız ən yüksək bal toplayan bir şəhər top-listə daxil edilib.

Bizim.Media xəbər verir ki, reytinqin qızıl medalı Cənubi Amerikaya – Perunun paytaxtı Lima şəhərinə qismət olub. Latın Amerikasının kulinariya mərkəzi sayılan sahil metropolisinin "sevice" və "kauza limenya" kimi dəniz məhsulları təamları yüksək qiymətləndirilib. Həmçinin Lima siyahıdakı 20 şəhər arasında qiymətlərin ən ucuz və əlçatan olduğu məkan seçilib.

Reytinqdə qərarlaşan qlobal qastronomiya liderlərinin ilk beşliyi belədir:

Lima (Peru) – Ən dadlı və ən münasib qiymətli yeməklər.

Banqkok (Tailand) – Unikal küçə yeməkləri (strit-fud) mədəniyyəti, şah əsərlərin qiyməti çox vaxt 5 dollardan azdır.

Mexiko (Meksika) – "Mişlen" ulduzlu restoranlardan tutmuş məşhur 12 məhəlləlik "tako koridoru"na qədər zəngin çeşid.

London (Böyük Britaniya) – Dünyanın ən multikultural mətbəx arenası, restoran keyfiyyətinə görə ən yüksək bal toplayan şəhər.

Barselona (İspaniya) – Aralıq dənizi ənənələri və rəngarəng məhəllə bazarları.

Ekspertlər qeyd edirlər ki, lider şəhərlərin ümumi cəhəti immiqrasiya dalğaları sayəsində zənginləşən və yerli dadlarla sintez olunan unikal kulinariya tarixinin olmasıdır. Məsələn, ABŞ-ın siyahıdakı yeganə təmsilçisi olan Nyu-York (15-ci yer) özünün məşhur pitsa, beql və delikateslərini məhz köçəri mədəniyyətlərin kəsişməsinə borcludur. İlk iyirmilikdə həmçinin Hoşimin, Melburn, Pekin, Afina, Lissabon, Osaka və Kopenhagen kimi şəhərlər yer alıb.

Bizim.Media