ABŞ Konqresinin üzvü Anna Paulina Luna yadplanetlilər və bibliya mətnləri arasında gözlənilməz paralellər apararaq sosial şəbəkələrdə geniş müzakirələrə səbəb olub.
Bizim.Media xəbər verir ki, onun X sosial şəbəkəsində paylaşdığı bir sıra postlar milyonlarla baxış toplayıb və qızğın mübahisələr yaradıb.
Söhbət eramızdan əvvəl təxminən 300-100-cü illər arasında yazıldığı hesab edilən qədim yəhudi mətni - Yenoxun Kitabından gedir. Həmin mətndə Yerə enən, qadınlarla münasibət quran və bibliya daşqınından əvvəl yaşamış nəhənglər nəslini törədən 200 mələkdən - “Mühafizəçilər”dən bəhs olunur.
Bu mətn əksər yəhudilər, katoliklər və protestantlar tərəfindən kanonik Bibliyaya daxil edilmir və mübahisəli hesab olunur. Lakin Luna iddia edir ki, həmin mətn qədim dövrlərdə yerdənkənar varlıqlarla təmaslar barədə məlumatları gizlətmək məqsədilə qəsdən kənarda saxlanılmış ola bilər.
Siyasətçi daha da irəli gedərək buna bənzər “sübutlar”ın incəsənətdə də tapıla biləcəyini vurğulayıb. O, xüsusilə “UFO-lu Madonna” kimi tanınan “Madonna və uşaq, körpə Müqəddəs İohanla” tablosunun görüntüsünü paylaşıb. Rəsmin arxa fonunda səmada sirli obyekt görünür və sui-qəsd nəzəriyyələrinin tərəfdarları bunu uçan boşqab kimi yozurlar.
Bu paylaşımlar istifadəçilər arasında kəskin reaksiyaya səbəb olub. Bəziləri konqresmeni dəstəkləyərək “həqiqətin həmişə göz qabağında olduğunu” bildirib, digərləri isə bu fikirlərə skeptik yanaşıb.
Tənqidçilər xatırladıblar ki, Yenoxun Kitabı etibarlı mənbə hesab edilmir və təsvir olunan hadisələrdən minilliklər sonra qələmə alınıb.
Qeyd edək ki, Anna Paulina Luna bundan əvvəl də UFO mövzusunda açıqlamalar verib. O, The Joe Rogan Experience podkastında kosmik gəmiləri şəxsən görmədiyini, lakin insan tərəfindən yaradılmasının mümkün olmadığına inandığı uçan aparatların fotoları ilə qarşılaşdığını demişdi.
Bundan başqa, siyasətçi UFO-larla bağlı məxfi sənədlərin açıqlanmasının ləngidilməsinə görə Pentaqonu da ittiham edib.
Onun sözlərinə görə, hakimiyyət bu cür məlumatları bu gün də gizlətməkdə davam edir.
Beləliklə, bu tarixə qısa müddətdə viral effekti yaradaraq dini mətnlərlə yerdənkənar sivilizasiyalar arasında əlaqə barədə nəzəriyyələrə marağı yenidən artırıb və auditoriyanı bir daha inananlar və skeptiklər olaraq iki yerə bölüb.
Bizim.Media
