Tütün, şərab, pambıq istehsalı və idxalı ilə bağlı yeni qadağalar -Qəbul olundu

Azərbaycanda tütün məmulatları, şərabçılıq məhsulları, pambıq və pambıq məhsullarının istehsalı, idxalı ilə bağlı yeni qadağalar tətbiq ediləcək.

Bu məsələ Milli Məclisin plenar iclasında müzakirə edilən “Tütün və tütün məmulatı haqqında”x9d, “Üzümçülük və şərabçılıq haqqında”x9d və “Pambıqçılıq haqqında”x9d qanunlara müvafiq dəyişikliklərdə öz əksini tapıb.

“Tütün və tütün məmulatı haqqında”x9d qanun layihəsinə əsasən, tütün və ya tütün məmulatları genetik modifikasiya olunmuş bitkilərdən, yaxud müasir biotexnoloji və gen mühəndisliyi metodları ilə yaradılmış kənd təsərrüfatı bitki materiallarından istifadə edilərək istehsal olunduqda onun idxalı qadağan edilir.

Bununla yanaşı, hazırda tütün məmulatının tərkibində nikotinin, tütün qatranının və karbon monoksidinin miqdarı müəyyən edilmiş yuxarı həddən çox olduqda onlar dövriyyədən götürülür. Yeni layihəyə əsasən isə tütün və tütün məmulatları həm də genetik modifikasiya olunmuş bitkilərdən, yaxud müasir biotexnoloji və gen mühəndisliyi metodları ilə yaradılmış kənd təsərrüfatı bitki materiallarından istifadə edilərək istehsal olunduqda onlar dövriyyədən götürülür.

“Üzümçülük və şərabçılıq haqqında”x9d qanun layihəsinə əsasən, şərabçılıq məhsullarının istehsalında genetik modifikasiya olunmuş bitkilərin, yaxud müasir biotexnoloji və gen mühəndisliyi metodları ilə yaradılmış bitki materiallarının istifadəsinə yol verilmir. Belə üsulla hazırlanmış şərabçılıq məhsullarının ölkəyə idxalına da icazə verilmir.

“Pambıqçılıq haqqında”x9d qanuna edilən yeni dəyişikliklərdə də pambıq və pambıq məhsullarının istehsalı və idxalı ilə bağlı eyni qadağaların tətbiq edilməsi təklif olunur.

Dəyişikliklər müzakirələrdən sonra səsə qoyularaq qəbul edilib.