Yaşasaydı, sabah doğum gününü qeyd edəcəkdi - FOTOLAR

Sabah, iyulun 26-da Neftçala rayonunun Aşağı Qaramanlı kəndində aprel döyüşlərində şəhid olmuş gizir Səfərov Elmidar Səlimxan oğlunun doğum günü qeyd olunacaq.

Moderator.az xəbər verir ki, şəhidin ruhunu yad etmək məqsədilə keçiriləcək tədbirdə rayon rəsmiləri, həmçinin dövlət qurumlarının nümayəndələri də iştirak edəcək.

Xatırladaq ki, Silahlı Qüvvələrin 24 yaşlı giziri Səfərov Elmidar cəbhə xəttinin Tərtər istiqamətində erməni hərbi birləşmələrinin təxribatının qarşısını alarkən qəhrəmancasına şəhid olub.  

Elmidar Səfərov 2012-ci ildən “N”x9d saylı hərbi hissədə həqiqi hərbi xidmətini başa vurduqdan sonra müddətdən artıq xidmət edib. Ən böyük arzusu torpaqlarımızın düşmən tapdağından azad olunması, üçrəngli bayrağımızın Qarabağ torpaqlarında dalğalanmasını görmək olub. Döyüş yoldaşları, dostları, qohumları arasında qorxmazlığı, qocaqlığı, igidliyi ilə tanınan və seçilən Elmidar Səfərovun bu arzusu onu şəhidlik zirvəsinə ucaltdı. Bu gün də hərbçi yoldaşları, onu tanıyan hər kəs 24 yaşlı kəşfiyyatçı gizirin qəhrəmanlıqlarından, qoxmazlığından, şücaətindən ağızdolusu danışır.

Qeyd edək ki, şəhid Elmidar Səfərov əslən Yardımlı rayonundandır. Ailədə 3 qardaş, 3 bacı olublar. Yardımlı rayonunun Horavar kəndində doğulan Elmidar 3 yaşında olarkən böyük qardaşı faciəvi şəkildə vəfat edib. Bundan sonra atası Səlimxan Səfərov ailəsi ilə birlikdə Neftçala rayonunun Aşağı Qaramanlı kəndinə köç edib. Ancaq bu köç də ailə üçün müsbət sonluqla bitməyib. Ailənin üzləşdiyi faciələr bundan sonra da davam edib. Belə ki, bir müddətdən sonra ailə başçısı Səlimxan Səfərov özü vəfat edib.  Elmidarın beş uşaqla başsız qalan anası övladlarını çox çətinliklə böyüdüb.

Anasının danışdıqlarına görə, son bir-iki il imiş ki, ailənin çətin günləri arxada qalıbmış, xoş günləri başlayırmış. Oğlu Elmidar özünə yeni avtomobil alıbmış. Həyətin bir hissəsinə tikinti materialları tökdürübmüş, yeni ev tikib anası ilə birlikdə yaşamaq istəyirmiş. Anası da oğluna nişan aparmağa hazırlaşırmış. Lakin bu dəfə də amansız  fələk ailənin sevincini gözündə qoyur, övladına nişan taxmağa hazırlaşan ana oğlunun şəhidlik xəbərini alır. Anaya övladının nişan mərasimində oynamaq əvəzinə, yas mərasimində ağlamaq qismət olur. İki dəfə doğmasını torpağa tapşırmış ananın ürəyinə üçüncü dəfə sağalmaz yara dəyir. Ancaq bu dəfə şəhid anasının qismən də olsa təsəlli yeri var. Çünki onun övladı şəhidlik zirvəsinə ucalıb, qanıyla, canıyla Vətən, torpaq uğrunda tarix yazıb. Bu gün şəhidimizin məzarı gənclərimizin and yerinə çevrilib. Bundan sonra böyüyəcək Elmidarlar şəhidlərimizin qanını yerdə qoymayacaqlarına and içirlər.

Şəhid gizir Elmidar Səfərov ölümündən sonra “Hərbi xidmətdə fərqlənməyə görə”x9d 3-cü dərəcəli medalı ilə təltif olunub.