Bu, neftin qiymətinin düşməyə başladığı 2014-cü ilin iyun ayından bəri OPEK-in ikinci toplantısıdır
Neft bazarında gözlər Neft İxrac Edən Ölkələr Birliyi və ya OPEK-in bu gün Avstriyanın paytaxtı Vyanada keçirdiyi toplantıya çevrilib.
ANS PRESS-in məlumatına görə, təşkilatın hasilat kvotası, düşən neft qiymətləri qarşısındakı mövqeyi, İranın vəziyyəti və Amerika Birləşmiş Ştatlarında artan neft hasilatı iclasın gündəliyində olan məsələlərdir.
Bu, neftin qiymətinin düşməyə başladığı 2014-cü ilin iyun ayından bəri OPEK-in ikinci toplantısıdır. Ötən ilin noyabrında keçirilən iclasda hasilatda azalmaya getməmək qərarı verən OPEK, 6 aylıq dövr üçün gündəlik orta hesabla 30 milyon barrel hasilat kvotası müəyyən etmişdi.
Lakin Səudiyyə Ərəbistanı və İraqın neft hasilatını artırması səbəbindən təşkilatın müəyyən etdiyi kvota aşılmış və son dövrdə hasilat gündəlik orta hesabla 31 milyon barrelin üzərinə çıxmışdı.
Düşən neft qiymətləri ilə bağlı növbədənkənar iclasa getməyən OPEK-in 12 üzvündən 7-si hasilatın azaldılmasını gözləyir. Səudiyyə Ərəbistanı da daxil olmaqla 4 ölkə təşkilatın hasilat kvotasını aşağı salmasını istəmir, bir ölkə hələ məsələ ilə bağlı mövqeyini açıqlamayıb.
