Qusarda İCLAS: İcra başçısı təhsildən yayınan uşaqların işlərinə baxdı - FOTO

Bu gün  Qusar Rayon İcra Hakimiyyəti yanında Uşaq Hüquqlarının Müdafiəsi üzrə Komissiyanın növbəti iclası keçirilib.

Bizim.Media xəbər verir ki, iclasda Qusar Rayon İcra Hakimiyyətinin başçısı Sahir Məmmədxanov, Komissiyanın sədri və üzvləri, habelə müzakirəyə çıxarılan məsələlərlə bağlı dəvət olunmuş vətəndaşlar iştirak edib.

Komissiyanın təsdiq olunmuş gündəliyinə əsasən, yetkinlik yaşına çatmayanların təhsildən yayınması faktları üzrə daxil olmuş 3 inzibati xəta haqqında və digər işlərə baxılıb. İclas zamanı hər bir inzibati iş üzrə valideynlərin izahatları dinlənilib və aparılmış araşdırmaların nəticələri hərtərəfli təhlil olunub.
 

Qusar Rayon İcra Hakimiyyətinin başçısı iclasda çıxış edərək, icbari ümumi orta təhsilin təmin edilməsinin dövlətin əsas vəzifələrindən biri olmaqla yanaşı, valideynlərin də birbaşa öhdəliyi olduğunu vurğulayıb. İcra başçısı uşaqların təhsildən yayındırılmasının yolverilməz hal olduğunu, bununla onların hüquq və mənafelərinin kobud şəkildə pozulduğunu xüsusi qeyd edib, valideynlərin bu sahədə qanunvericiliklə müəyyən edilmiş məsuliyyətini bir daha xatırladıb.

Gündəlikdəki məsələlərin müzakirəsi zamanı Komissiya üzvləri mövcud vəziyyətlə bağlı hüquqi qiymət verib, rəy və təkliflərini səsləndiriblər. Aparılmış müzakirələrin yekunu olaraq, rayon ərazisində təhsildən yayınma hallarının vaxtında aşkarlanması və aradan qaldırılması, yetkinlik yaşına çatmayanların təhsil müəssisələrinə davamiyyətinə nəzarət mexanizmlərinin təkmilləşdirilməsi, valideyn məsuliyyətinin artırılması məqsədilə hüquqi maarifləndirmə işinin gücləndirilməsi zərurəti nəzərə alınmaqla səs çoxluğu ilə müvafiq qərarlar qəbul edilib.

Qəbul olunmuş qərarların icrası ilə əlaqədar aidiyyəti qurumlara müvafiq tapşırıqlar verilib, icraya nəzarət komissiyaya həvalə olunub.