Bugünlərdə Moderator.az-a müraciət edən Gəncə şəhər sakini Namiq Mustafayev Gəncə şəhər Kardioloji Xəstəxanası ilə bağlı şikayətini dilə gətirib. Müraciətdə deyilir:
“Bu gün Gəncə şəhər
Kardioloji Xəstəxananın baş həkimi Fəxrəddin
Namazovla telefon əlaqəsi saxlayaraq pulsuz müayinə üçün xəstəxanaya müraciət
etmək istədiyini bildirdim. Baş həkim bildirdi ki, xəstəxananın şöbə müdiri
Nizami Nəcəfova deyərəm, müayinə olunarsan. Lakin baş həkim söylədi ki, yalnız
sənin pulsuz müayinəni həyata keçirəcəyik. Yəni səninlə birlikdə ikinci, üçüncü
şəxs gəlsə, onlar pulsuz müayinə olunmayacaq.
Xəstəxanada exo müayinədən
keçəndən sonra N.Nəcəfov mənə bildirdi ki, 15 manat ödəməlisən. Mənsə üstümdə cəmi
10 manat pul olduğunu söylədim. Habelə qeyd etdim ki, pulsuz müayinə
olunacağımla bağlı baş həkimin məlumatı və razılığı var. Bu zaman exo müayinənin
nəticəsini əks etdirən sənədləri götürən N.Nəcəfov bildirdi ki, nə zaman 15
manat gətirərsən, o zaman sənədi götürərsən. Şöbə müdiri qeyd etdi ki, mənə güzəşt
edə bilməz, çünki hər gün baş həkimə hesabat verir.
Qeyd etdiyim kimi, exo müayinəsindən keçsəm də, müayinənin sənədləri həkim girovluğundadır. Sənədlərimi bu girovluqdan azad etmək üçün isə məndən 15 manat pul tələb edilir. Halbuki, qanunvericiliyə görə, dövlət müəssisələrində vətəndaşların müayinəsi və müalicəsi dövlət hesabına aparılmalıdır. Lakin göründüyü kimi, Gəncə şəhər Kardioloji Xəstəxanasında bu qanunlara əhəmiyyət verən yoxdur. Odur ki, mən üzümü hörmətli səhiyyə naziri Oqtay Şirəliyevə tutub xahiş edirəm ki, ya tabeçiliyindəki bu xəstəxanada qanunların işləməsini təmin etsin, ya da mənə 5 manat pul göndərsin ki, həmin 5 manatı cibimdəki 10 manatın üstünə qoyub həkim Nizami Nəcəfovun tələb etdiyi 15 manatı verim, sənədlərimi girovluqdan azad edim. Ümid edirəm ki, hörmətli nazir üzləşdiyim problemə biganə qalmayacaq, bu problemin hansısa formada həllində mənə kömək edəcək”x9d.
