Moldova MDB-dən çıxdı

Moldova hökuməti Müstəqil Dövlətlər Birliyinin (MDB) əsas müqavilələrinin denonsasiyasını (fəaliyyətini birtərəfli qaydada dayandırmaq) təsdiqləyib. 

Bizim.Media xəbər veror ki, bu barədə ölkənin Nazirlər Kabineti müvafiq qərar qəbul edib.
 

Qərara əsasən, hökumət MDB çərçivəsində imzalanmış bir sıra fundamental sənədlərin ləğvi ilə bağlı təşəbbüsü dəstəkləyib və məsələ parlamentin təsdiqinə təqdim olunacaq. Rəsmi Kişinyov bu addımı ölkənin xarici siyasət kursunun dəyişməsi və Avropa İttifaqı ilə inteqrasiya prosesinin sürətlənməsi ilə izah edir.

Moldova hökumətinin nümayəndələri bildiriblər ki, MDB çərçivəsində imzalanmış bir çox sazişlər artıq aktual deyil və ölkənin strateji prioritetlərinə uyğun gəlmir. Bu səbəbdən həmin sənədlərin denonsasiyası ilə bağlı proses mərhələli şəkildə həyata keçirilir.

Son illərdə Moldova MDB strukturlarından tədricən uzaqlaşır. Ölkə artıq bir sıra təşkilati platformalarda iştirakını dayandırıb və bir neçə sazişdən çıxmaq barədə qərar qəbul edib.

Ekspertlərin fikrincə, bu addım Kişinyovun siyasi və iqtisadi kursunun Avropa yönümlü olduğunu bir daha nümayiş etdirir. Moldova hazırda Avropa İttifaqına üzvlük prosesini sürətləndirmək və Qərb institutları ilə əməkdaşlığı genişləndirmək niyyətindədir.

Bizim.Media