Ölkədə qızılca və suçiçəyinə yoluxma ilə bağlı SON DURUM

“Respublika üzrə infeksion xəstəliklərlə bağlı epidemioloji vəziyyət sabitdir və tam nəzarət altındadır”.

Bu barədə Bizim.Media-nın sorğusuna Səhiyyə Nazirliyinin Respublika Gigiyena və Epidemiologiya Mərkəzindən cavab olaraq bildirilib.

Bildirilib ki, ölkədə qızılca xəstəliyinə qarşı Milli Peyvənd Təqviminə uyğun olaraq planlı immunizasiya aparılır, eyni zamanda əvvəlki dövrlərdə peyvənddən kənarda qalmış şəxslərin peyvəndlənməsi üçün tibb müəssisələrində müvafiq imkanlar mövcuddur:

“Suçiçəyi xəstəliyi mövsümi xarakter daşıyır və əsasən payız-qış aylarında müşahidə olunur.

Hazırda xəstəliyin ölkə üzrə geniş yayılması halları qeydə alınmır. Profilaktik tədbir kimi vətəndaşlara şəxsi gigiyena qaydalarına riayət etmək və xəstəlik əlamətləri yarandıqda tibb müəssisələrinə müraciət etmək tövsiyə olunur.

Eyni zamanda, tibb müəssisələri tərəfindən əhali arasında mütəmadi maarifləndirmə işləri aparılır və epidemioloji vəziyyət davamlı olaraq izlənilir.

Ümumilikdə, respublika üzrə infeksion xəstəliklərlə bağlı epidemioloji vəziyyət sabitdir və tam nəzarət altındadır.

Qeyd edilib ki, Azərbaycan Respublikası Səhiyyə Nazirliyinin Respublika Gigiyena və Epidemiologiya Mərkəzi tərəfindən ölkə ərazisində yoluxucu xəstəliklərin profilaktikasına yönəlmiş zəruri tədbirlər planlı şəkildə davam etdirilir”.

Xatırladaq ki, fevralın 14-də "Nur" uşaq evində 2024-cü il təvəllüdlü Ömür Zeyniyevin qızılca xəstəliyindən öldüyü ilə bağlı məlumat yayılıb.

Naibə Məmmədova, Bizim.Media