"Qarabağ"ın rəqibinin baş məşqçisi istirahətə YOLLANDI

UEFA Çempionlar Liqasının növbəti - 5-ci turunda “Qarabağ”ın rəqibi olan “Napoli”nin baş məşqçisi Antonio Konte komandasını qısamüddətlik köməkçisinə həvalə edib.

Bizim.Media xəbər verir ki, baş məşqçi milli komandaların oyunları üçün yaranan fasilə dövründə istirahətə yollanıb.

Klub A Seriyasının 11-ci turunda “Bolonya”ya 0:2 hesabı ilə uduzandan sonra italiyalı mütəxəssis qısamüddətli fasilə götürüb. Onun 17 noyabrda geri qayıdacağı bildirilir.

Məlumata görə, Konte bu bir həftəlik fasiləni öncədən klubla razılaşdırıb. Hazırda o, Turin şəhərindədir. Komandanı məşqlərə baş məşqçinin köməkçisi Kristian Stellini hazırlayır.
 

Qeyd edək ki, İtaliya çempionatında 11 turdan sonra “Napoli” 22 xal toplayaraq turnir cədvəlində 4-cü pillədə qərarlaşıb və liderlər “İnter” və “Roma”dan 2 xal geri qalır. Çempionlar Liqasında isə komanda 4 oyundan 4 xalla 24-cü yerdədir.

Xatırladaq ki, “Napoli” UEFA Çempionlar Liqasının Liqa mərhələsində “Qarabağ”ın rəqibi olacaq. Komandalar arasındakı qarşılaşma noyabrın 26-da (Bakı vaxtı ilə 00:00) İtaliyada baş tutacaq.

Bizim.Media