Almaniyalı jurnalistlər QUSARDA - FOTO

Cari ilin 7–14 sentyabr tarixlərində Almaniyanın nüfuzlu “Berliner Zeitung” qəzetinin jurnalistləri Thomas Fasbender və Leo Razumovski Azərbaycanda səfərdə olacaqlar. Onlar Bakı ilə yanaşı, bölgələrə də baş çəkərək, tarixi və dini abidələrlə tanış olacaq, multikulturalizm və dinlərarası dialoq mövzularında müvafiq şəxslərlə görüşlər keçirəcəklər.

Qusar rayon icra hakimiyyətindən Bizim.Media-nın yerli bürosuna verilən məlumata görə, sentyabrın 8-də jurnalistlər Qusarın icra hakimiyyətinin başçısı Sahir Məmmədxanovla görüşüblər.

Görüşdə Qusar rayonunda son illərdə həyata keçirilən sosial-iqtisadi və infrastruktur layihələri, əhalinin rifahına yönəlmiş tədbirlər, eləcə də tolerant mühitin qorunması və inkişaf etdirilməsi istiqamətində görülən işlər barədə müzakirələr aparılıb.

Səfər çərçivəsində qonaqlar həmçinin Qusar rayonunun qədim yaşayış məskənlərindən biri olan Hil kəndində də olublar.