Korrupsiyalaşmış məmurların xarici ölkələrdəki pul və daşınmaz əmlakının dövlət tərəfindən müsadirə edilməsi son günlər ictimai-siyasi xadimlər tərəfindən ən çox səsləndirilən təkliflərdən biridir. Bu qəbildən olan siyasilər hesab edir ki, belə bir addımın atılması həm dövlətdən oğurlanan vəsaitlərin eri qaytarılması, həm də böhranın nəticələrinin zəiflədilməsi baxımından müstəsna əhəmiyyət kəsb edir.
Məsələ ilə bağlı Moderator.az-a açıqlama verən ADR sədrinin müavini
Səxavət Əlisoy nəinki ali, hətta orta təbəqəyə məxsus məmurlaırn belə xaricdə külli
miqdarda maddi vəsaitə və dəyəri milyonlarla hesablanan əmlaka sahib olduğuna
diqqət çəkdi:
"Dövlətin mövcud durumunun məsuliyyəti təbii ki, prezident İlham
Əliyevin çiynindədir. Prezident bu ağır durumdan çıxmaq üçün islahatlara start
verib və bu, təqdirəlayiqdir. Paralel olaraq, İlham Əliyev büdcəni talan edən
komanda üzvlərini ciddi cəzalandırdığı halda cəmiyyətdən böyük dəstək hiss
edəcək. Bir anlığa təsəvvür edin ki, gəlirlər barədə bəyannamə qanunu qəbul
olunub. Yüksək vəzifəli rüşvətxorların komaya düşəcəyi şəksizdir. Ayda
1000-1500 manat maaş alan icra başçısı, nazir, komitə sədri, rektor və sair
zatlar 5-10 milyon dollarlıq obyektlərə hansı yolla sahib olduqlarını
prezidentin qarşısında açıqlamalıdır. Azərbaycanda hansı vəzifəli şəxsin hansı
obyektə sahib olduğunu gizli saxlamaq mümkün deyil. Sadə vətəndaş bunu bilirsə,
yuxarılar daha mükəmməl billgilərə malikdir.
Bu gün az-çox olaylardan baş çıxaran adam təsdiq edər ki, nazirlər,
icra başçıları, rüşvət almaq, büdcəni talamaq iqtidarında olan digər görəv
sahiblərinin əlində milyardlar var. Dövlətdən oğurlanmış pullar dövlətə qaytarılmalıdır".
S.Əlisoyun qənaətincə, dövlət öz gücünü korrupsioner məmurlara
göstərməlidir: "Qanun və dövlət öz kimliyini rüşvətxorlara,
korrupsionerlərə və monopolistlərə sübut etməlidir. Talançılar, rüşvətxorlar
dövlətə qarşı çıxacaqlarmı? Xeyr! Oğruda, talançıda bu cəsarət ola bilməz.
Mafiyanın vətəni sayılan İtaliyada ötən əsrin sonlarında "Təmiz
əllər" əməliyyatı gerçəkləşdi və dövlət korrupsiyaya, talançılığa yol
vermiş vəzifə sahiblərini ciddi cəzalandırdı. Belə bir inqilabi əməliyyata
Azərbaycanın ciddi ehtiyacı var. Şəxsi fikrimdir, prezident İlham Əliyev
Azərbaycanda anoloji "Təmiz əllər" əməliyyatını gerçəkləşdirsə,
2018-ci ildə prezident seçkilərində şübhəsiz xalq tərəfindən yenidən prezident
seçilər".
Seymur Əliyev
