VİP-in mətbuat xidmətindən Moderator.az-a adıçəkilən partiyanın Siyasi Şurasının bəyanatı daxil olub.Bəyanatı olduğu kimi təqdim edirik:
2013-cü il oktyabrın 9-da keçiriləcək
prezident seçkilərində Vətəndaş və İnkişaf Partiyası tərəfindən namizədliyi irəli
sürülmüş Əli Əliyevin 15 avqust 2013-cü il tarixdən imzatoplama kampaniyasına
start verilmişdir. Namizədin qeydə alınması üçün zəruri olan 40 min imzaya
qarşı sentyabrın 3-ə qədər 46 səlahiyyətli nümayəndə, 200-ə yaxın partiya fəalı
və təəssübkeşi tərəfindən 44750 imza toplanmışdır. Beş gün ərzində namizədin
seçki Qərargahında həmin imzalar ekspert qrupu tərəfindən yoxlanmış, sentyabrın
8-də 853 imza vərəqində 42364 imza (88 seçki dairəsi daxil olmaqla) Mərkəzi
Seçki Komissiyasına (MSK) təqdim edilmişdir.
Sentyabrın 13-də MSK şübhəli arqumentlərə
əsaslanaraq Əli Əliyevin namizədliyinin qeydə alınmaması ilə bağlı qərar çıxarmışdır.
MSK istənilən namizədə qarşı irəli sürülə biləcək, şübhə doğuran və gülünc
oxşar imza iddiası ilə 6592 “saxta imza” aşkar etmişdir. MSK Seçki Məcəlləsinin
59.3-cü maddəsini kobud şəkildə pozaraq imzaların yoxlanması prosesinə namizədin
səlahiyyətli nümayəndələrindən heç birini dəvət etməmişdir.
VİP Siyasi Şurası bəyan edir ki, Əli Əliyevin
qeydə alınmaması bir daha hakimiyyətin öz təsiri altına ala bilmədiyi milli və
dövlətçilik maraqlarını hər şeydən üstün tutan siyasi təşkilata və onun rəhbərinə
qarşı qərəzli mövqeyinin bariz nümunəsidir. Əslində hakimiyyətin Əli Əliyevə
qarşı çirkin addımı 2010-cu il parlament seçkilərində də özünü açıq-aşkar göstərmişdi.
15 saylı Yasamal I seçki dairəsində seçkilərin gedişinə kobud müdaxilə olunmuş,
dairədə heç bir dəstəyi olmayan şəxs deputat təyin edilmişdir.
VİP Siyasi Şurası Ə.Əliyevə qarşı yönələn
çirkin addımları həm də, partıyanın son dövrlərdə Rusiyanın Azərbaycanda
aparmaq istədiyi yeni müstəmləkəçi siyasətinə qarşı ardıcıl mövqeyinin hakimiyyətdəki
Rusiya meylli qüvvələrin maraqlarına uyğun gəlməməsi kimi dəyərləndirilir.
MSK-nın 13 sentyabr 2013-cü il tarixli qərarının
qanunsuz hesab edildiyini, prezidentliyə namizəd Ə.Əliyevin və minlərlə VİP
üzvünün hüquqlarının kobud şəkildə pozulduğunu bəyan edən VİP Siyasi Şurası
bununla yanaşı imzatoplama kompaniyasında iştirak edən bütün partiya üzvlərinə Ə.Əliyevin
namizədliyinin qeydə alınması üçün imza verən on minlərlə seçiciyə öz minnətdarlığını
bildirir.
VİP Siyasi Şurası bəyan edir ki,
hakimiyyət bu qanunsuz qərar vasitəsilə rəqiblərindən birini sıradan çıxarmaqla
əvvəlcədən seçkinin demokratikliyini və legitimliyini, ədalətli keçiriləcəyini
birmənalı şəkildə şübhə altına alır.
