Tehrandan Vaşinqtona sərt ultimatum: "Sağ qalmaq istəyirsinizsə, regionu tərk edin!"

İranın xarici işlər naziri Abbas Araqçı ABŞ ordusuna rəsmi müraciət edərək, bütövlükdə Yaxın Şərq regionunu təcili şəkildə tərk etməyə çağırıb.

Bizim.Media xəbər verir ki, "X" sosial şəbəkəsində kəskin bəyanatla çıxış edən baş diplomat Vaşinqtonu birbaşa hərbi zərbələrlə hədələyib.

XİN rəhbəri ABŞ-a xəbərdarlıq edərək bildirib ki, İran ordusu öz təhlükəsizliyini qorumaq üçün hər an radikal addımlara hazırdır:

"Bizim silahlı qüvvələrimiz heç bir hücumu və ya təhdidi cavabsız qoymayacaq. Əgər təhlükəsizlikdə olmaq istəyirsinizsə, regionumuzu tərk edin".
 

Məsələnin hərbi-siyasi fonu olduqca gərgin xarakter daşıyır. Belə ki, bu ultimatumdan bir qədər əvvəl Hörmüz boğazı üzərində ABŞ-a məxsus "Apache" hərbi helikopterinin vurulması regionu müharibə astanasına gətirib. Helikopterin vurulmasına cavab olaraq ABŞ Silahlı Qüvvələrinin Mərkəzi Komandanlığı (CENTCOM) İran ərazisindəki strateji hədəflərə ağır zərbələr endirdiyini bəyan edib.

Öz növbəsində İspaniya xəbər mənbələrinin də təsdiqlədiyi kimi, İran İslam İnqilabı Keşikçiləri Korpusu (SEPAH) dərhal cavab əməliyyatına başlayaraq ABŞ-ın Yaxın Şərqdə yerləşən bir neçə hərbi bazasına kütləvi raket və dron hücumları təşkil edib. Ekspertlər hazırda bölgədə irimiqyaslı müharibə riskinin ən yüksək həddə çatdığını vurğulayırlar.

Bizim.Media