"Gürcüstan noyabr ayının sonuna kimi Azərbaycanla sərhəddə 5 nəzarət-buraxılış məntəqəsi tikəcək".
ANS PRESS-in məlumatına görə, bu barədə Gürcüstanın baş naziri İrakli Qaribaşvili bu il ölkədə həyata keçirilən sərhəd infrastruktur layihələrinin təqdimatı zamanı bildirib.
Onun sözlərinə görə, həmçinin müvafiq sərhəd infrastrukturunun tikintisi də planlaşdırılır: "Avropa İttifaqının "Şərq Tərəfdaşlığı" proqramı çərçivəsində Azərbaycan və Gürcüstan arasında beş sərhəd nəzarət-buraxılış məntəqəsinin tikintisinə başlanacaq. Qeyd etmək lazımdır ki, Gürcüstan hökuməti sərhəd infrastrukturunun yenidən qurulması üçün səylərini maksimuma çatdırmağa çalışır. Bu il ərzində Sərhəd polisi və onun inzibati binası yenidən qurulub", - deyə Qaribaşvili söyləyib.
Baş nazirin sözlərinə görə, artıq 2014-cu ildə 10 yeni nəzarət-buraxılış məntəqəsi tikilərək istifadəyə verilib:
"Türkiyə ilə sərhəddə - 2, Ermənistanla sərhəddə - 3, Azərbaycanla sərhəddə - 2, Rusiya ilə sərhəddə isə 3 nəzarət-buraxılış məntəqəsi var. Gürcüstanın yeni iqtidarı üçün sərhədlərin qorunması əsas hədəflərdəndir", -deyə Gürcüstan baş naziri bildirib.
