Arif Hacılı oğlunun və gəlininin HƏBSİNDƏN DANIŞDI

"ABŞ-də ölkədə olan sığınacağı olmayan şəxslər haqqında müəyyən araşdırmalar aparılıb. Oğlum və gəlinimlə bağlı məsələ də bu qəbildəndir. Bunu həbs adlandırmaq doğru deyil".

Bizim.Media xəbər verir ki, bunu teleqraf.az-a Müsavat Partiyası Məclisinin sədri Arif Hacılının oğlu Orxan Hacılı və gəlini Yaqut Hacılının ABŞ-də həbs edildiyinə dair yayılan xəbərlərə münasibət bildirərkən deyib.

O qeyd edib ki, oğlu və gəlini ümumiyyətlə, həbs olunmayıblar:

"Heç sığınacaqda da deyillər. Müəyyən dövrdə onların vizalarının vaxtının keçməsi ilə əlaqədər müəyyən araşdırmalar olub və məsələ başa çatıb. Əslində bu hadisə sentyabrın əvvələrində olub. Hər gün onlarla telefonla danışıram, bütün sənəd məsələləri həll olunub. Saxta sənəd hazırlanması kimi yayılan xəbərlər tamamilə uydurmadır”.

Arif Hacılı bildirib ki, hazırda ABŞ-dəki vəziyyətə görə bu ölkədə sığınacaq almayan hər kəsin istintaqa cəlb edilməsi mümkündür:

"Onlar da bu kontekstdə istintaqa cəlb olunmuşdular. Sadəcə onlar hələ də bu ölkədə daimi yaşamaq hüququ əldə etməyiblər”.

Qeyd edək ki, Arif Hacılının oğlu Orxan Hacılı və gəlini Yaqut Hacılının ABŞ-də həbs edildiyi iddia edilir.

Bizim.Media