Bu gün Əmək və Əhalinin Sosial Müdafiəsi Nazirliyinin tabeliyində fəaliyyət göstərən Əmək Bazarı və Sosial Müdafiə Məsələləri üzrə Milli Observatoriyanın Qiymətləndirmə Mərkəzində, Nazirliyin tabeliyində olan qurumlarda vakant vəzifələrin tutulması məqsədilə müsabiqənin imtahan mərhələsi keçirilib.
Bizim.Media xəbər verir ki, Milli Observatoriyanın mətbuat katibi Fidan Seyidşahqızı imtahanla bağlı jurnalistlərə açıqlama verib.
O bildirib ki, müraciətlər nazirliyin vahid elektron platforması Əmək və məşğulluq altsistemi tərəfindən aparılır.
"Müsabiqə mərhələsi 2 hissədən ibarətdir. Birinci imtahan mərhələsidir, bu Milli Observatoriyanın qiymətləndirmə mərkəzi tərəfindən təşkil edilir. İmtahan 100 dəqiqə davam edir, 70 faiz sualı cavablandıran namizədlər uğurlu hesab edilir və ikinci, yəni müsahibə mərhələsinə buraxılır. Bu mərhələ öncədən elan olunmuş proqram əsasında namizədlərin bilik səviyyəsi və vəzifəyə uyğunluğu yoxlanılır.
Əsasən elmlər doktoru dərəcəsi olan, ən azı 5 il dövlət qulluğu stajı, peşəkar tibb və mühasib sertifikatı olan, yüksəliş müsabiqəsinin finalçıları, "Gənc Dost Könüllü" proqramını A sertifikatı ilə bitirən namizədlər sənəd qəbulu zamanı təsdiqedici sənədləri sistemə yükləməklə imtahan prosesindən azad olurlar".
Nəzrin Mirzəyeva, İntiqam İbrahimov, Bizim.Media
