Beynəlxalq Forum Aureliya Qriqoriunun müdafiəsinə qalxdı - FOTOLAR

Moderator.az xəbər verir ki, bu gün Beynəlxalq Antiişğal Forumunun təşəbbüsü ilə moldovalı hüquq müdafiəcisi Aureliya Qriqoriunun hüquqlarının müdafiəsinə həsr olunmuş Dəyirmi Masa keçirilib.

Tədbirdə tanınmış QHT rəhbərləri, Qarabağ döyüşçüləri, ictimaiyyət nümayəndələri iştirak ediblər. Beynəlxalq Forumun Azərbaycan təmsilçiliyinin rəhbəri Akif Nağı, QHT rəhbərləri və Qarabağ döyüşçüləri Mehdi Mehdiyev, Tahirə Məmmədova, Mehriban Abdullayeva, Sultan Əzimzadə, Sərraf Orucov, Cəsarət Hüseynzadə, Əjdər Əzizov, İlham Qayıbzadə, İntiqam Mirzəyev, Xətai Baxışov, Bəhram Şeydayev və digərləri çıxış edərək məsələ ilə bağlı ciddi narahatlıqlarını bildiriblər. Azərbaycan üçün həddindən çox iş görmüş, Azərbaycanın həqiqi dostu Aureliya Qriqoriunun səmərəli müdafiəsinin təşkili üçün təkliflərini veriblər.xa0

Çıxışlarda Diaspor Komitəsinin rəhbəri Nazim İbrahimovun məsələyə biganə yanaşması, hətta Bakıya gəlmiş Aureliya Qriqoriunu qəbul belə etməməsi kəskin tənqid olunub, onun dövlət başçısı tərəfindən cəzalandırılması, onunla bağlı Milli Məclisdə məsələ qaldırılması təklifləri səsləndirilib. Çıxış edənlər moldovalı hüquq müdafiəçisinin Azərbaycanın dövlət mükafatı ilə təltif olunmasını da təklif ediblər. Qarabağ döyüşçülərindən bir qrupu Moldovaya gedib Aureliya Qriqoriunun mühafizəsini təşkil etməyə hazır olduqlarını bildirib. Dəyirmi Masada bu günlərdə Bakıya səfərə gələcək Moldova prezidenti İqor Dodona müraciət edilməsi, Moldovanın Azərbaycandakı səfiri ilə görüşülməsi, ehtiyac olarsa səfirliyin qarşısında etiraz aksiyasının keçirilməsi, Moldovadakı Azərbaycan diaspor təşkilatlarına xüsusi müraciət göndərilməsi ilə bağlı qərarlar qəbul olunub.

Sonda Dəyirmi Masa iştirakçıları bəyanat qəbul ediblər. Bəyanatda göstərilir: xa0

"Biz Moldovalı hüquq müdafiəçisi, vətəndaş cəmiyyəti fəalı, ictimai xadim Aureliya Qriqoriunun erməni millətçiləri tərəfindən təzyiq və təhdidlərə məruz qalmasını qətiyyətlə pisləyirik. A.Qriqoriu Moldova və Azərbaycanda ədalətli, mübariz, prinsipial hüquq müdafiəçisi kimi tanınır. O, haqsızlıqlara qarşı həmişə mübarizə aparıb, həmçinin Ermənistan rejiminin Azərbaycana qarşı haqsız iddialarını, təcavüz və işğalçı hərəkətlərini, törətdiyi vəhşilikləri, o cümlədən Xocalı soyqırımını pisləyən bəyanatlar verib, çıxışlar edib. Həmişə Azərbaycanın haqq işini müdafiə edib. Buna görə də ermənilər ondan intiqam almağa, ona qarşı qondarma məhkəmə işi açdırmağa çalışırlar".