Rusiya Prezidenti Vladimir Putinin xarici ölkələrlə investisiya və iqtisadi əməkdaşlıq üzrə xüsusi nümayəndəsi Kirill Dmitriyev rəsmi "X" (keçmiş Twitter) sosial şəbəkə hesabında Böyük Britaniyadakı mövcud daxili böhranla bağlı dünya mediasının diqqətini çəkən olduqca ironik bir bəyanat yayıb.
Bizim.Media xəbər verir ki, Rusiya rəsmisi bəşəriyyətlə təmasa hazırlaşdıqları iddia edilən yadplanetlilərə (kosmik sivilizasiyalara) müraciət edərək, onları Böyük Britaniyanın Baş naziri Kir Starmeri istefa verməyə inandırmağa çağırıb.
Dmitriyevin paylaşımında yer alan diplomatik ironiya dolu sətirlər beynəlxalq mətbuatda geniş müzakirələrə səbəb olub:
"Əziz yadplanetlilər, siz bəşəriyyətlə təmasa hazırlaşdığınız bir vaxtda, xahiş edirəm öz qüdrətinizi və xeyirxahlığınızı nümayiş etdirərək Kir Starmeri istefa verməyə inandırın. Heç bir oğurluq və ya zondlama (bədənə yad cisim yeritmə) əməliyyatına ehtiyac yoxdur — sadəcə insanların onun barəsində nə düşündüyünü ona başa salın. O, istefa verməklə Qərb sivilizasiyasına yeni bir ümid bəxş edə bilər".
Kreml rəsmisi bu qeyri-adi şərhi Böyük Britaniyanın tərkib hissəsi olan Şimali İrlandiyada Sudandan gələn miqrantın yerli britaniyalıya qarşı törətdiyi amansız hücumdan sonra başlayan kütləvi etiraz aksiyaları və hökumət əleyhinə yönələn iğtişaşlar fonunda paylaşıb.
Ekspertlər qeyd edirlər ki, rəsmi Moskva bu cür sətiraltı mesajlarla Londonun miqrasiya siyasətini və daxili təhlükəsizlik rıçaqlarının zəifləməsini diplomatik yumor prizmasından tənqid edir.
Bizim.Media
