Türkiyədən Ermənistanla sərhədin açılacağı tarixlə bağlı AÇIQLAMA

Türkiyə hökuməti rəsmi Ankara ilə İrəvan arasında quru sərhədlərinin açılması üçün hazırda hər hansı konkret müddətin və ya tarixin müəyyən edilmədiyini açıqlayıb.

Bizim.Media xəbər verir ki, "RİA Novosti" agentliyinin Türkiyə hökumətindəki diplomatik mənbələrə istinadən yaydığı məlumata görə, bu istiqamətdə atılacaq növbəti addımlar tamamilə iki ölkə arasında münasibətlərin ümumi normallaşma prosesinin gedişatından asılı olacaq.

Türkiyə Xarici İşlər Nazirliyinin mətbuat katibi Öncü Keçeli may ayının ortalarında verdiyi bəyanatda iki ölkə arasında birbaşa ticarətin başladılması üçün zəruri olan texniki və bürokratik hazırlıqların yekunlaşdığını bildirmişdi.
 

Ermənistan Baş naziri Nikol Paşinyan da daha əvvəl bəyan etmişdi ki, əldə olunmuş razılıqlara əsasən, Türkiyə öz mallarını üçüncü ölkələr vasitəsilə rəsmiləşdirməyə ehtiyac qalmadan birbaşa Ermənistana tədarük edə biləcək.

Ankara Ermənistanda yenicə baş tutan parlament seçkilərindən sonrakı siyasi mənzərəni izləyir. Cənubi Qafqazda regional sabitliyin və mehriban qonşuluq münasibətlərinin möhkəmlənməsi üçün İrəvanla konstruktiv dialoqun davam etdirilməsi planlaşdırılır.

Tarixi arayış: Türkiyə ilə Ermənistan arasında diplomatik münasibətlər mövcud deyil və iki ölkə arasındakı quru sərhədi 1993-cü ildən (Birinci Qarabağ müharibəsi dövründən) bəri bağlı qalmaqdadır.

Münasibətlərin bərpası üçün xüsusi nümayəndələr (Serdar Kılıç və Ruben Rubinyan) səviyyəsində danışıqlara 2022-ci ildə start verilib.

Həmin ilin iyulunda sərhədin üçüncü ölkə vətəndaşları və diplomatik pasport sahibləri üçün açılması barədə Vyanada razılıq əldə olunsa da, həmin qərar indiyədək praktik olaraq reallaşdırılmayıb.

Bizim.Media