Lyayendən Paşinyana təbrik: "Ermənistan bizə arxalana bilər"

Ermənistanda keçirilən parlament seçkilərində Nikol Paşinyanın rəhbərlik etdiyi “Vətəndaş Müqaviləsi” Partiyasının rəsmi olaraq 61 mandatla mütləq qələbə qazanmasından sonra Qərbdən İrəvana növbəti yüksək səviyyəli dəstək bəyanatı gəlib.
 
Bizim.Media xəbər verir ki, Avropa Komissiyasının sədri Ursula fon der Lyayen rəsmi qələbə münasibətilə Ermənistanın Baş naziri Nikol Paşinyana təbrik məktubu ünvanlayıb.
 
Ursula fon der Lyayen öz müraciətində Avropa İttifaqının Ermənistandakı mövcud hakimiyyətə tam dəstək verdiyini nümayiş etdirərək, diqqətçəkən ifadələr işlədib:
 
"Hörmətli Nikol Paşinyan, sizi seçkilərdə qazandığınız qələbə münasibətilə səmimi qəlbdən təbrik edirəm. Avropaya getdikcə daha da yaxınlaşan Ermənistan ilə tərəfdaşlığımızı yüksək qiymətləndiririk. Ermənistan bizə tamamilə arxalana bilər. Sizin 2018-ci ildə rəhbərlik etdiyiniz “Məxməri inqilab”ın ruhu hələ də yaşayır və fəaliyyətdədir".
 

Xatırladaq ki, bundan əvvəl Fransa Prezidenti Emmanuel Makron da seçkilərə Rusiyanın genişmiqyaslı müdaxilə etdiyini bəyan edərək Paşinyan hakimiyyətinə dəstək nümayiş etdirmişdi.

Ekspertlərin fikrincə, Avropa İttifaqının bu cür birbaşa və açıq dəstək bəyanatları, yeni formalaşacaq hökumətin xarici siyasətdə Avropaya inteqrasiya xəttini daha da sürətləndirəcəyindən xəbər verir.
 
Bizim.Media