Erməni spiker Matviyenkoya qızıl medal verdi – Bakının təhvil verdiyi livanlı snayperə görə

Ermənistan parlamentinin sədri Ararat Mirzoyan Rusiya Federal Məclisi Federasiya Şurasının sədri Valentina Matviyenkonu iki ölkə arasında  parlamentlərarası əlaqələrin möhkəmləndirilməsində və Azərbaycan Ordusuna qarşı vuruşan livanlı snayper Maral Najaryanın Azərbaycan əsirliyindən azad edilməsindəki mühüm töhfəsinə görə qızıl medalla təltif edib.

Bizim.Media xəbər verir ki, bu barədə məlumatı Ermənistan parlamentinin mətbuat xidməti yayıb.

Matviyenko koronavirusa baxmayaraq Ermənistanla ikitərəfli görüşlərin bərpa olunduğunu qeyd edib və parlamentlər arasındakı dialoqdan məmnunluğunu ifadə edib. Eyni zamanda Dağlıq Qarabağda hərbi əməliyyatların dayandırılması və münaqişə bölgəsində Rusiya sülhməramlılarının mövcudluğu barədə üçtərəfli bəyannamənin qəbul olunduğunu vurğulayıb.

Ararat Mirzoyan, öz növbəsində Ermənistan və Rusiya arasında strateji əlaqələrin müxtəlif sahələrdə tədricən inkişaf etdiyini vurğulayıb.

Müzakirə zamanı tərəflər Ermənistanda keçiriləcək növbədənkənar parlament seçkilərində MDB Parlamentləraarsı Assambleyanın müşahidəçi missiyasının iştirakı barədə razılığa gəliblər.

Bizim.Media