Azərbaycan XİN-dən BƏƏ-nin Dəməşqdəki səfirliyinə hücuma REAKSİYA

Azərbaycan XİN bir qrup etirazçının Birləşmiş Ərəb Əmirliklərinin Suriyanın paytaxtı Dəməşqdəki səfirliyinə hücumunu pisləyib.

Bizim.Media xəbər verir ki, XİN bu barədə "X" hesabında yazıb.

“Biz Suriya Ərəb Respublikasının Dəməşq şəhərində bir qrup etirazçılar tərəfindən BƏƏ səfirliyinə edilən son hücumu şiddətlə qınayırıq. Diplomatik missiyalara qarşı bu cür zorakılıq aktları qəbuledilməzdir, beynəlxalq hüququn, eləcə də diplomatik heyətin, obyektlərin mühafizəsi və təhlükəsizliyinə zəmanət verən Diplomatik Münasibətlər üzrə Vyena Konvensiyasının aydın şəkildə pozulmasıdır.

Biz Suriya hökuməti tərəfindən verilən bəyanatı və hökumətin bu məsələyə görə məsuliyyət daşıyanların qanun qarşısında cavab vermələri üçün bütün tədbirlərin görülməsi ilə bağlı əzmini alqışlayırıq”, - paylaşımda bildirilib.

Qeyd edək ki, aprelin 4-də Suriya paytaxtındakı BƏƏ səfirliyinin qarşısında etiraz aksiyası keçirilib. İştirakçılar BƏƏ səfirliyini "sionist səfirliyi" adlandırıb və İsrailin terrorçulara qarşı ölüm hökmü qanunundan narazılıqlarını bildiriblər. Bəzi etirazçılar binaya soxulmağa cəhd göstəriblər.