“Azəriqaz” bu abonentini pulsuz qazla təmin edəcək - FOTO

Azərbaycan Dövlət Neft Şirkətinin (SOCAR) “Azəriqaz” İstehsalat Birliyinin 2,4 milyonuncu abonentinin adı məlum olub.

“Azəriqaz”dan Bizim.Media-ya verilən məlumata görə, o, paytaxtın Xəzər rayonu, Qala qəsəbəsi, Ədalət küçəsində qeydiyyatda olan Sevil Canəkbər qızı İsgəndərovadır.

Ailənin maddi durumunda sıxıntılar olduğundan “Azəriqaz” İB bu fərdi yaşayış evinin qazlaşdırılmasını öz üzərinə götürüb. 

"Aparılan hesabatlar zamanı təsadüfi olaraq Sevil xanımın 2 milyon 400 mininci abonent olduğu məlum olub.

Bu məqsədlə Birliyin Baş direktoru Ruslan Əliyev və Həmkarlar İttifaqı Komitəsinin sədri Ədalət Qurbanov abonentin fərdi yaşayış evini ziyarət ediblər", deyə "Azəriqaz"dan bildirilib.

Görüş zamanı Ruslan Əliyev tərəfindən abonentin ailə başçısına təşəkkürnamə və qiymətli hədiyyə təqdim olunub.

Birliyin Baş direktoru ailənin həyat şəraiti və qayğıları ilə də yaxından maraqlanıb.

Ailənin maddi durumunun çox ağır olduğunu öyrənən birlik rəhbəri ailə başçısı Bəhruz Zalovun “Azəriqaz” İB-də müvafiq işlə də təmin olunacağını bildirib.

Bizim.Media