Evdə çəkilən foto ünvanınızı tapa bilər - ABŞ-da yeni süni intellekt qalmaqalı

ABŞ-da hüquq-mühafizə orqanlarının istifadəsinə verilən yeni süni intellekt texnologiyası mənzilin daxilində çəkilmiş adi bir fotoşəkil əsasında onun dəqiq harada yerləşdiyini müəyyən edə bilir.

Bizim.Media xəbər verir ki, "Raven" (əvvəlki adı ilə "GeoSpy") adlanan və "Graylark" şirkəti tərəfindən hazırlanan bu alət heç bir GPS koordinatı və ya fayl metadatası olmadan belə işləyir.

Şirkət rəhbərliyinin təqdimatında bəlli olub ki, mənzilin yerini tapmaq üçün hətta xüsusi bir detalın olmasına gərək yoxdur — sadə bir paltaryuyan maşının, quruducunun, vanna otağındakı kafel dizaynının və ya tualet ləvazimatlarının fotosu belə kifayət edir.

Sistem ev daxilindəki mebel, məişət texnikası və memarlıq elementlərini daşınmaz əmlak və qısamüddətli icarə platformalarındakı (Zillow, Airbnb və s.) milyonlarla foto ilə müqayisə edərək ünvanı dərhal təyin edir.

Cinayətkarlıqla mübarizə, yoxsa şəxsi həyata müdaxilə?

Proqram təminatçıları bu texnologiyanın ilkin olaraq insan alveri və ağır cinayətlərin araşdırılması, eləcə də itkin düşənlərin tapılması üçün polisin işini asanlaşdırmağa xidmət etdiyini bildirirlər. Lakin ekspertlər xəbərdarlıq edir ki, sosial şəbəkələrdə ev şəraitində çəkilib paylaşılan hər bir fotoşəkil artıq istifadəçilərin təhlükəsizliyi və məxfiliyi üçün ciddi risk mənbəyinə çevrilir.

Bizim.Media