Güləşçimizin Avropa çempionatında uğursuz çıxışının səbəbi BİLİNDİ

Azərbaycanın yunan-Roma güləşçisi Sənan Süleymanovun Rumıniyanın paytaxtı Buxarestdə keçirilən Avropa çempionatındakı uğursuz çıxışının səbəbi bəlli olub.

Bizim.Media xəbər verir ki, bu barədə 28 yaşlı idmançı Azərbaycan Güləş Federasiyasının mətbuat xidmətinə açıqlamasında deyib.

77 kiloqram çəki dərəcəsində çıxış edən idmançı bildirib ki, qitə birinciliyi ərəfəsində aldığı zədə səbəbindən məşq edə bilməyib: 

“Yarışa beş gün qalmış belimin yuxarı hissəsindəki yırtıqda kəskin ağrı oldu. L4, L5 və S1 disklərdə də sürüşmə və yırtıq var. Ancaq bunların heç birini məğlubiyyətimə bəhanə göstərmək istəmirəm. Hələ Buxarestdə olduğum üçün müalicə prosesinin nə qədər çəkəcəyini deyə bilmirəm. Sol çiynim və sol dizimdə də müəyyən ağrılar var. Belimdəki zədə ümumiyətlə sağalacaq vəziyyətdə deyil. Bu, ömürlük zədədir. Sadəcə ağrıları müalicə yolu ilə azaltmaq mümkün olur. Artıq bu zədələrlə yaşamağa alışmışam”, - deyə güləşçi bildirib.

Qeyd edək ki, Sənan Süleymanov Avropa çempionatında keçirdiyi ilk görüşdə Almaniya təmsilçisi İdris İbayevə 8:0 hesabı ilə qalib gəlsə də, 1/4 finalda xorvatiyalı Antonio Kamenyaseviçə məğlub olub - 1:3.

Bizim.Media