Ermənistanın gələcək inkişaf istiqaməti ilə bağlı qərar ölkə vətəndaşlarının ixtiyarındadır.
Bizim.Media xəbər verir ki, bunu Rusiya Xarici İşlər Nazirliyinin Avropa problemləri departamentinin direktoru Vladislav Maslennikov bildirib.
O, “RİA Novosti”yə müsahibəsində Ermənistan cəmiyyətinin Avropa İttifaqı ilə yaxınlaşmanın mümkün risklərini obyektiv şəkildə qiymətləndirə biləcəyinə ümid etdiyini deyib.
“Ölkənin inkişaf istiqaməti ilə bağlı yekun seçim istənilən halda Ermənistan vətəndaşlarının ixtiyarında qalır. Bu baxımdan inanmaq istəyirik ki, onlar hazırda cəlb edildikləri həmin “Avropaya inteqrasiya” avantürasının təhlükəsini obyektiv şəkildə qiymətləndirə biləcəklər”, – Maslennikov deyib.
Ermənistan özünü Aİİ ilə Aİ arasında seçim qarşısında necə qoyub?
Avrasiya İqtisadi İttifaqının (Aİİ) üzvü olan Ermənistan parlamenti 2025-ci ilin martında ölkənin Avropa İttifaqına üzvlük prosesinə başlaması barədə qanun qəbul edib. Həmin ilin aprelində bu qanun respublikanın prezidenti Vaaqn Xaçaturyan tərəfindən təsdiqlənib.
Mayın 9-da Rusiya Prezidenti Vladimir Putin keçirdiyi mətbuat konfransında İrəvanın Aİ və ya Aİİ-də iştirak məsələsində mümkün qədər tez qərar verməli olduğunu bildirib və “sivil boşanma” ehtimalını irəli sürüb.
Onun sözlərinə görə, bu məsələ ilə bağlı referendum keçirmək mümkün ola bilər.
Öz növbəsində, Ermənistanın Baş naziri Nikol Paşinyan mayın 11-də jurnalistlərə bildirib ki, Ermənistan Aİİ-nin tamhüquqlu üzvü olaraq qalır və referendum yalnız “obyektiv zərurət” yarandığı halda keçirilə bilər.
Bundan sonra Rusiya Baş nazirinin müavini Aleksey Overçuk Ermənistanda Aİ standartlarına keçidlə bağlı müəyyən işlərin aparıldığını bildirib.
Onun sözlərinə görə, ölkə texniki reqlamentlərə dəyişiklik etməyə başlasa, “bu, artıq Aİİ üçün müəyyən təhlükələr yaradacaq”.
2026-cı il mayın 29-da Astanada keçirilən Aİİ sammitində bu quruma üzv ölkələrin liderləri birgə bəyanatla çıxış ediblər. Bəyanatda, xüsusilə Ermənistanda ölkənin Aİ-yə üzv olması və ya Aİİ-də qalması ilə bağlı referendumun mümkün qədər tez keçirilməsinin zəruriliyi vurğulanıb.
Rusiya Prezidenti Vladimir Putin Astanada keçirilən Aİİ sammitinin yekunlarına dair bildirib ki, Ermənistan Aİİ-dən çıxacağı təqdirdə ÜDM-nin 14 faizini itirə bilər.
Statistik məlumatlara əsasən, Ermənistan Avrasiya İqtisadi İttifaqından çıxacağı təqdirdə əmtəə dövriyyəsinin təxminən 40 faizini itirə bilər. (Mənbə: Sputnik Ermənistan)
Bizim.Media
