Milyarder adasını satmaq istəyir – 1 dollar təklif edənlər də var

Bitcoin vasitəsilə sərvət qazanan tanınmış texnologiya investoru, "Draper Associates" şirkətinin təsisçisi Tim Dreyper Afrikadakı şəxsi adasını satmağa çalışır. O, böyük maraqla qarşılaşdığını, qızıl mədənləri, evlər, inəklər, hətta 1 dollar təklif edənlərin (qalan məbləği imkan olanda ödəmək şərti ilə) belə olduğunu bildirib.

Bizim.Media xəbər verir ki, Dreyper adanı sosial şəbəkələrdə 7,9 milyon dollara və ya ən yaxşı təklifə satışa çıxardığını elan etdikdən sonra Tanzaniya Torpaq Nazirliyi adanın əslində məhz Dreyperə deyil, "Tanzania Investment and Special Economic Zones Authority" (TISEZA) qurumuna məxsus olduğunu açıqlayıb.

Milyarder isə yalnız adada inşa edilmiş binaları və villaları satacağını deyib.

Lupita adasının tarixi: Təxminən 110 akr ərazisi olan Tanzaniyadakı Tanqanyika gölündə yerləşən kimsəsiz ada 2004-cü ildə tikilməyə başlanıb və 2008-ci ildə kurort kimi açılıb. Layihəyə təxminən 6 milyon dollar sərmayə qoyan Dreyper ailəsinin adadan az istifadə etdiyi üçün onu satmaq qərarına gəldiyini və prosesin sonunda kitab yazmaq fikrinə düşdüyünü qeyd edib.

Digər milyarderlərin adaları: Nəşr xatırladır ki, Dreyper adasını satan yeganə milyarder deyil; məsələn, "Virgin Group"un təsisçisi Riçard Branson Neker və Moskit adalarını, "Oracle" şirkətinin həmtəsisçisi Larri Ellison isə Havaydakı Lanai adasının əksər hissəsini alaraq inkişaf etdiriblər.

Bizim.Media