Zelenski silah yardımı üçün Qərbə SƏSLƏNDİ – “Bu il Rusiya təcavüzünə son qoymaq lazımdır”

Ukrayna prezidenti Zelenski müharibənin uğurla bitməsi üçün Qərbdən dəstək istəyib. O, bu il Rusiya təcavüzünə son qoymaq üçün silah yardımına ehtiyac olduğunu bildirib.  

Bizim.Media xarici KİV-ə istinadən xəbər verir ki, Zelenski bu barədə videomüraciət edib. O, çıxışında Fransa prezidenti Emmanuel Makronla telefon danışığı apardığını və Fransanın ölkəsinə təkərli tanklar göndərəcəyini bildirib.

Fransanın bu silah dəstəyinin əhəmiyyətinə işarə edən Zelenski silah yardımının Avropanın təhlükəsizliyi üçün də vacib olduğuna diqqət çəkib:

“Bu il Rusiyanın təcavüzünə son qoymaq lazımdır və terrorçu dövlətin məğlubiyyətini sürətləndirə biləcək müdafiə vasitələrinin heç birini gecikdirməmək vacibdir”.

Rusiyanın Ukraynaya qarşı yeni hücum dalğasına hazırlaşdığını iddia edən Zelenski məsələ ilə bağlı bəzi ölkələrin liderlərini məlumatlandırdığını da vurğulayıb. 

Əsas məqsədlərinin bütün Ukrayna torpaqlarının azad edilməsi olduğunu qeyd edən Zelenski ölkəsində tezliklə sülhün bərqərar olmasının vacibliyini qeyd edib. 

Zelenski bəyan edib ki, Rusiya ordusu Donetsk bölgəsində hərbi varlığını artırmağa davam edir.

Bizim.Media