Gənclər milli-mənəvi dəyərlərə sahib çıxırmı? – Sorğunun GÖZLƏNİLMƏZ NƏTİCƏLƏRİ

Ölkə əhalisinin 48,8 faizi hesab edir ki, indiki nəsil milli-mənəvi dəyərlərə daha yaxşı sahib çıxır.

Bizim.Media xəbər verir ki, bu Sosial Tədqiqatlar Mərkəzinin apardığı sorğu nəticəsində müəyyən edilib.

STM milli ideologiyanın inkişafında siyasi-ideoloji əhəmiyyətə malik olan milli-mənəvi dəyərlərə sahiblik kultunun qorunub saxlanılmasına müxtəlif dövrlərin nəsilləri arasında ictimai baxışın öyrənilməsi məqsədilə rəy sorğusu keçirib.

Bu məqsədlə, respondentlərə “Sizcə, əvvəlki nəsillərlə müqayisədə indiki nəsil arasında milli-mənəvi dəyərlərə sahiblik hissi qorunub saxlanılıb, yoxsa itirilib?” sualı ünvanlanıb.

Sorğuda iştirak edən və müxtəlif nəsilləri təmsil edən respondentlərin təqribən yarısı və ya 48,8 faizi əvvəlki nəsillərlə müqayisədə indiki nəsil arasında milli-mənəvi dəyərlərə sahiblik hissinin qorunub saxlanıldığı qənaətindədir.

Əvvəlki nəsillərlə müqayisədə indiki nəsil arasında milli-mənəvi dəyərlərə sahiblik hissinin itirildiyini düşünənlər isə respondentlərin 48,3 faizini təşkil edib.

Sorğu iştirakçılarının cüzi hissəsi - 2,9 faizi bu sualla bağlı hər hansı mövqe ifadə etməyib.