Putinlə Trampın söhbətinin DETALLARI: Görüşlə bağlı köməkçilərinə tapşırıq veriblər

Rusiya və ABŞ prezidentləri Vladimir Putin və Donald Tramp dünənki telefon danışığının gedişində təmasların davam etdirilməsi və ayrıca görüşün təşkil olunması ilə bağlı razılığa gəliblər.

Bizim.Media xəbər verir ki, bu barədə Rusiya prezidentinin mətbuat katibi Dmitri Peskov jurnalistlərə açıqlamasında deyib.
 

O bildirib ki, liderlərin köməkçilərinə görüşün hazırlıq işlərinə başlamaları tapşırılıb.

Kreml rəsmisindən Trampın gələcək görüşün Səudiyyə Ərəbistanında keçəcəyi ilə bağlı sözlərini şərh etməsi istənilib. Peskov bununla bağlı hələ detallı müzakirələrin aparılmalı olduğunu bildirib.

“Prezidentlər razılaşdılar ki, müvafiq köməkçilərə dərhal tapşırıqlar veriləcək və onlar lazımi hazırlıq işlərinə başlayacaqlar. Hazırda bu proses sürətlə işə düşəcək. Görüşün detalları ilə bağlı qərarları gözləmək lazımdır”, – Rusiya prezidentinin mətbuat katibi vurğulayıb.

Telefon danışığının prezidentlərdən hansının təşəbbüsü ilə baş tutduğu sualını isə Peskov şərh etməkdən imtina edib.

Qeyd edək ki, Rusiya və ABŞ liderləri arasında telefon danışığı ötən gün axşam saatlarında baş tutub və bir saat yarım davam edib.

Bizim.Media