ABŞ Prezidenti Donald Trampın administrasiyası İrana qarşı hərbi əməliyyatların mümkün genişləndirilməsi ərəfəsində İsrailə onlarla əlavə havada yanacaqdoldurma təyyarəsi göndərmək niyyəti barədə bu ölkəni məlumatlandırıb.
Bizim.Media xəbər verir ki, bu barədə “Axios” portalı üç amerikalı və israilli rəsmiyə istinadən məlumat yayıb.
Nəşrin məlumatına görə, bu qərar Ağ Evin Vəziyyət otağında keçirilən və prezidentə bir neçə yeni hərbi ssenarinin təqdim olunduğu iclasdan sonra müzakirə edilib. Nəzərdən keçirilən variantlar arasında İrana qarşı hazırkı Hörmüz boğazı ətrafındakı zərbələrin hüdudlarını xeyli aşacaq irimiqyaslı əməliyyat da var.
Mənbələr iddia edir ki, müzakirə olunan ssenarilərə infrastruktur obyektlərinə, o cümlədən elektrik stansiyalarına zərbələr endirilməsi, zənginləşdirilmiş uran ehtiyatlarını daha dərindən bloklamaq məqsədilə nüvə obyektlərinə yeni hücumlar, həmçinin ABŞ kəşfiyyatının məlumatına görə nüvə proqramının inkişafı üçün istifadə oluna biləcək “Pickaxe Mountain” yeraltı obyektinə mümkün zərbələr daxildir.
“Axios”un məlumatına görə, Donald Tramp hələlik yekun qərar qəbul etməyib. Lakin mənbələr bildirir ki, Ağ Ev İranı Hörmüz boğazını açmağa və ABŞ-nin nüvə proqramı ilə bağlı tələblərini qəbul etməyə məcbur etmək üçün hərbi təzyiqi gücləndirmək variantını nəzərdən keçirir.
Nəşr qeyd edir ki, bununla bağlı müvafiq qərar artıq yaxın günlərdə verilə bilər.
Bizim.Media
