Əfqanıstanın yeni hökuməti ilə ABŞ arasında təhlükəsizlik sazişi imzalanıb.
ANS PRESS-in məlumatına görə, bu saziş dekabrın 31-də beynəlxalq qüvvələrin missiyasının başa çatmasından sonra 12 min əsgərdən ibarət xarici qüvvənin ölkədə qalmasına imkan verəcək. Xarici qüvvələri 10 min ABŞ və 2 min NATO əsgəri təşkil edəcək.
Sənəd Əfqanıstanın milli təhlükəsizlik üzrə müşaviri Hənif Atmar və ABŞ-ın Kabildəki səfiri Ceyms Kunninqham tərəfindən imzalanıb.
ABŞ səfiri sazişin Əfqanıstan xalqının yeni hökumət vasitəsi ilə seçimi olduğunu deyib.
Əfqanıstanın sabiq prezidenti Həmid Karzayi 2001-ci ildən Talibana qarşı əməliyyatlar zamanı mülki əhalinin itkisinə görə sazişin əleyhinə çıxırdı.
Taliban isə hücumlarına ara vermir. Dünən Kabildə kamikadze hücumu nəticəsində 6 adam həlak olub.
