Bəşər Əsədin qızının BƏƏ-də universitetdə təhsil aldığı ÜZƏ ÇIXDI

Birləşmiş Ərəb Əmirliklərində (BƏƏ) universitetdə təhsil alan Suriyanın sabiq prezidenti, hazırda Moskvada yaşayan Bəşər Əsədin qızı Zeyn kurs yoldaşlarının birindən “sənin burada olmağın arzuolunmazdır” məzmunlu mesaj alıb.

Bizim.Media xəbər verir ki, bu barədə “The New York Times” yazıb.

Mesajı göndərən tələbə qısa müddət sonra diqqət mərkəzindən yoxa çıxıb. BƏƏ-nin təhlükəsizlik orqanları tərəfindən dindirildikdən sonra o, universitetdən uzaqlaşdırılıb.

Qəzetin araşdırmasına görə, 2024-cü ilin dekabrında rejimin süqutundan sonra Bəşər Əsədin ailəsi ilə birlikdə Rusiyaya gedən Suriya rəhbərliyinin onlarla keçmiş yüksəkvəzifəli nümayəndəsinin harada olduğu müəyyən edilib.

Əvvəlcə Əsəd və yaxınları Four Seasons otelinin apartamentlərində məskunlaşıb, daha sonra “Moskva-Siti”dəki “Federasiya” qülləsində iki mərtəbəli penthausa, ardınca isə Rublyovkada yerləşən malikanəyə köçüblər.

Qeyd olunur ki, onilliklər ərzində Suriya prezidenti Bəşər Əsəd və onun ən yaxın müttəfiqləri yüz minlərlə insanın kütləvi işgəncələrə məruz qalması və yoxa çıxması ilə əlaqələndirilib.