Hindistanda dələduz həmvətənlərini Azərbaycanda iş vədi ilə aldadıb

Hindistanın Mumbay şəhərində Məhəmməd Şafik Məhəmməd Hanif Xan adlı 42 yaşlı kişi fırıldaqçılıq ittihamı ilə həbs edilib. O, 7 nəfəri Azərbaycanda və Yeni Zelandiyada işə düzəldəcəyini vəd edərək ümumilikdə 3,59 milyon rupi (təxminən 70 534 manat) aldadıb.

Bizim.Media xəbər verir ki, bu barədə “Times of India” nəşri yazıb.

Mənbə qeyd edir ki, Xan özünə məxsus kadr agentliyi vasitəsilə zərərçəkənlərə saxta vizalar, təyyarə biletləri və işə qəbul məktubları təqdim edib.

Sənədlərin saxtalığı ilə bağlı şübhələr yaranandan sonra zərərçəkənlər məsələnin dələduzluq olduğunu anlayıblar.
 

Araşdırma zamanı məlum olub ki, Xan bundan əvvəl də oxşar üsulla bir neçə nəfəri aldadıb, onlardan 8 milyon rupi toplayaraq ABŞ və Yeni Zelandiyaya iş və viza vəd etmişdi. Həmin hallarda da eyni saxta sənədlərdən istifadə olunub.

Polis hazırda Xanın şəriki hesab edilən Zarina adlı bir qadını da axtarır. O, Mumbayın Mira-Roud adlı ərazisində yerləşən digər ofisi idarə edib.

Bizim.Media