Ötən axşam Daşkəsən rayonu ərazisində təbii fəlakət baş verib. Yağış və dolu ilə müşayiət olunan güclü külək - qasırğa nəticəsində Daşkəsən şəhərinin 10-dan artıq yaşayış və inzibati binanın dam örtüklərinə və rayonun yol, elektrik, rabitə təsərrüfatına, əkin sahələrinə ziyan dəyib.
İcra Hakimiyyətindən Moderator.az-a bildirilib ki, şəhər sakinlərindən birinin fərdi minik avtomobilinin üzərinə ağac aşması nəticəsində maşın yararsız hala düşüb.
Baş vermiş təbii fəlakət barədə aidiyyəti üzrə qurumlara məlumatlar verilib. Dəymiş ziyanın həcminin müəyyənləşdirilməsi üzrə işlər aparılır. Daxili imkanlar hesabına dəymiş ziyanın aradan qaldırılması üzrə müvafiq tədbirlər görülür.
