İsgəndər Həmidov: “...hərbçi Nəcməddin dönüb alverçi Nəcməddin oldu”

Keçmiş müdafiə nazirinin sələfi Zakir Həsənovun təyinatına Moderator.az saytına verdiyi müsahibəsində münasibət bildirərkən o dövrün proseslərinə yenidən işıq salınması ortalığı bulandırdı və qarşılıqlı ittihamlar saytımızın son 15 günlük gündəmini məşğul edən mövzulardan birinə çevrildi. Odur ki, bəzi iddialara, ittihamlara aydınlıq gətirmək üçün keçmiş daxili işlə naziri İsgəndər Həmidovla danışmaq  zərurəti yaranmışdı. Fürsətdən istifadə edərək ona gündəmin digər aktual mövzuları ətrafında da sual ünvanladıq.

-Rəhim Qazıyevin Surət Hüseynovun gizli toplantıda Etibar Məmmədovun baş nazirliyə namizədliyini irəli sürdüyü məşhur 92-ci ilin 5 noyabr görüşündə iştirak etmisinizmi? Doğrudanmı Surət Hüseynov təklif edib ki, siz Etibar Məmmədova baş nazirlik verin, əl-ələ verək Qarabağ məsələsini birdəfəlik həll edək?

Birincisi, noyabrın 5-ədək artıq Surət Hüseynova iki vəzifə birdən verilmişdi və o Milli Qəhrəman adına layiq görülmüş korpus komandiri idi. Doğrudan da artıq Surət Hüseynov böyük nüfuz sahibinə çevrilmişdi. Odur ki, onun təklifi ilə Rəhim Qazıyevin göstərişi əsasında Hərbi Dəniz Donanmasının Mərdəkandakı bağ evinə yığışdıq. Dəqiq xatırlamıram, ancaq səhv etmirəmsə mən, İsa bəy, Pənah bəy, Rəhim Qazıyev və Surət Hüseynov həmin görüşdə olub.

-Bəs Rəhim Qazıyev Etibar Məmmədovun, Şadman Hüseynovun, Tahir Əliyevin də həmin görüşdə olduğunu iddia edir.

-Məncə başqa adam yox idi. Elə ki, Surət Hüseynov Etibar Məmmədovun namizədliyini irəli sürdü, biz gördük ki, burda əsas niyyət heç də Qarabağ problemini birdəfəlik həll etmək yox, vəzifə davası aparmaqdır. Doğrusu, həmin gün mənim rəhbərlik edəcəyim başqa bir əməliyyat var idi, ona görə də daxili işlər naziri kimi kabinetimdə olmağım lazım idi, ona görə də həmin məşhur görüşün sonrakı məcrasını oturub gözləmək imkanım olmadığından çox tez çıxdım.

-Surət Hüseynovun təklifi Sizi qane etmədiyindən görüşü yarımçıq tərk etdiniz?

-Yox, mənim üçün əslində heç fərqi də yox idi. Mən daxili işlər naziri idim, hər dəqiqə iş başında olmaq lazım idi və ona görə də belə deyək ki, üzrlü səbəbdən sonadək otura bilmədim. Ancaq görünür elə düz etmişəm ki, nə danışıldığını gözləmədən çıxmışam. Çünki sonralar İsa bəy dedi ki, çox düz edib getdin, elə ən ağıllı adam sən imişsən.

-Tahir Əliyev də həmin görüşdə olmayıb?

-Məncə olmayıb. Keçmiş gündü, dəqiq deyə bilmərəm, ancaq məncə o yox idi.

-İsgəndər Həmidovun istefa məsələsinin hansı Rusiya rəsmisinin dilindən səslənməsi barədə də birmənalı fikir yoxdur. Rəhim Qazıyev iddia edir ki, onun iştirak etdiyi heç bir görüşdə Rusiya müdafiə naziri Pavel Qraçov İsgəndər Həmidovun istefa məsələsini qoymayıb. Cümşüd Nuriyevsə iddia edir ki, Qraçov deyil, o vaxt Rusiyanın Azərbaycandakı səfiri Valter Şoniya rəsmi Moskvanın bu istəyini dilə gətirib ki, İsgəndər Həmidov istefaya göndərilsin, o zaman Rusiya Kəlbəcərin geri qaytarılmasına razılıq verəcək...

-Mən Cümşüd Nuriyevin bir müddət öncə mətbuatdakı müsahibəsini özüm oxumuşam ki, Qraçov bu təklifi bir neçə dəfə səsləndirib.

-Amma indi Valter Şoniyanın adını çəkir...

-Bilirsiniz, hətta mənim özümə də kimsə bunu desəydi istefa verməzdim, nəinki Qraçov, lap Yeltsin tələb etsəydi belə. Ancaq söhbət mənim doğma rayonumdan getdiyinə görə dinə bilmədim. Amma bu o demək deyil ki, başqa rayonun taleyindən də söhbət getsə analoji addımı atmazdım. Mən nəinki Kəlbəcərin və ya başqa rayonun, hansısa bir kəndin qaytarılmasında seçim qarşısında qalsaydım, tərəddüd etmədən nazir kürsüsünü verərdim.

-Rəhim Qazıyev iddia edir ki, 93-cü ilin 4-5 aprelində, Kəlbəcərin işğalından bir neçə gün sonra o, Pənah Hüseyn və Abbas Abbasov Qraçovun kabinetində razılaşıblar ki, aprelin 20-də Gəncədəki 23-cü hərbi hava-desant diviziyasının komandanının köməyi ilə Kəlbəcərin geri alınması əməliyyatına rus qoşunları lazımi köməkliyi göstərsin. Rəhim Qazıyev elə bir razılaşmanı sonradan Azərbaycan tərəfinin pozduğunu iddia edir. Sizin belə bir razılaşmanın hər hansı konturlarından məlumatınız olubmu?

-Mən başa düşə bilmirəm. Ya həmin adamlar bilərəkdən tarixi təhrif edirlər, ya da yaddaşları pozulub. Gəncədəki 23-cü diviziya 92-ci ilin sonlarında Gəncədən köçüb getmişdi. Mən belə bir razılaşmanın mövcudluğundan və ya kimlərinsə günahı üzündən pozulmasından xəbərsizəm, belə bir şeyi də cəfəngiyat hesab edirəm.

-Hərəkat yoldaşlarınızdan biri də Qurban Məmmədovdur ki, o üçüncü məhbəs həyatı dövrünü yaşayır.

-Mən bir dəfə də Qurbanın həbsinə kəskin etirazımı bildirmişəm. Bu gün də deyirəm ki, mənə görə Qurban həbsdədirsə, deməli, Azərbaycanın vicdanı məhbəsdədir. Mən hər zaman Qurbana Azərbaycanda haqq səsin carçısı, qoruyucusu kimi baxmışam və onun ikrahdoğurucu ittihamlarla dəmir barmaqlıqlar arasına salınmasını mən Azərbaycanda ədalətin, haqq səsin, vicdanın və ləyaqətin buxovlanması kimi başa düşürəm. Eynilə Pərviz Həşimlinin də uydurma ittihamlarla həbsi adamda ikrah hissi doğurur. Tanınmış bir jurnalistə qarşı Bin Ladenin cangüdəni kimi davranılması, ona qarşı ağlasığmaz zorakılıq, amansızlıq  sərgilənməsi bu həbsi həyata keçirənlərin, onu sifariş verənlərin gücünü deyil, acizliyini göstərir. Qurbana və Pərvizə də deyirəm ki, darıxmasınlar, ya onları ordan çıxaracağıq, ya da onların yanına gələcəyik

-Daha bir hərəkat yoldaşınız-Müsavat başqanı İsa Qəmbər də obrazlı desək, yol üstədir. O partiya başqanlığından getmək istəsə də gedə bilmir. İsgəndər bəy kimi 25 illik hərəkat yoldaşının qoltuğunda varis  görür?

-Nə gizlədim, mən də İsa bəyin getməsini istəməyənlərdənəm. Başım xeyli vaxtdı yaxın qohumumun yas mərasiminə qarışdığından çoxdandı İsa bəyi görmürəm. Mən də onunla ilk fürsətdəcə görüşüb fikirlərimi bildirəcəm ki, hələ getmək vaxtı deyil. Amma bu heç də o demək deyil ki, onun davamçıları yoxdur. Bu partiyada başqanlığa layiq kifayət qədər adam var.

-Üzvü olduğunuz Milli Şuradakı həmsədrlik söz-söhbəti qurumda ikitirəlik yaradıb. İsgəndər Həmidovun mövqeyi necədir?

Mən həmsədrliyin tamamilə əleyhinəyəm. Çünki bu institut keçilmiş və özünü doğrultmayan yoldur. Amma mən də hesab edirəm ki, bu qurumun tərkibinə əl gəzdirilməli və kabab iyinə gələnləri deyil, mücadilə aparmaq istəyində olanları  birləşdirmək lazımdır. Məncə Milli Şura bundan sonra da xeyli iş görəcək və sonda istəyinə nail olacaq. Qısa zamanda bu qurum nəyə qadir olduğunu göstərdi.

-Yeni müdafiə naziri təyin olundu. Amma az qala ölkənin bütün hərbi ekspertləri və ehtiyatda olan zabit korpusu  Baş Qərargah rəisi Nəcməddin Sadıqovun da istefa verməli olduğunu bildirir, əks halda orduda hər şeyin köhnə hamam, köhnə tas olacağını iddia edirlər...

-Mən hərbi ekspertlərin açıqlamalarından və mətbuatdakı müzakirələrdən məlumatlıyam. Ancaq deyəsən, o qədər unutqan olmuşuq ki, yaxın tariximiz belə yadımızdan çıxmağa başlayıb. Xatırladım ki, birinci Qarabağ savaşında iki ən uğurlu hərbi əməliyyatımız olub, Biri Ağdərədə, o biri Goranboy ətrafında, onların hər ikisinə Nəcməddin Sadıqov rəhbərlik edib. Mən Nəcməddin Sadıqovu 21 ildir görmürəm, heç ömrümün sonunadək də onu görmək arzusunda da deyiləm. Ancaq mənim tanıdığım Nəcməddin bacarıqlı, peşəkar hərbçi, Jukov kimi bir cəngavər idi. Ancaq nə yazıq ki, indiki iqtidara qoşulandan sonra hərbçi Nəcməddin dönüb oldu alverçi Nəcməddin.

-Vasyakı da yaxından tanımısınız, çiyin-çiyinə döyüşmüsünüz. Onun yenidən Bakıya gətirilib Müdafiə Nazirliyində yüksək vəzifə verilməsi nə anlama gəlir? Olmaya üfüqdə ikinci Qarabağ savaşı görünməyə başlayır?

-Niyə təkcə Vasyakın adını çəkirik? Onunla bərabər Komarov, Mudryak kimi rəşadət gösərmiş insanları xatırlamalıyıq. Mudryakın həyat yoldaşı azərbaycanlı idi və Qarabağda can qoydu bu adam, bir müddət öncə də vəfat edib. Komarov həm Tərtərdə, həm Goranboyda  artilleriya komandiri idi, bu istiqamətdəki uğurlarımızda onun da böyük əməyi olub. Vasyak da milliyətcə belarusdur və kifayət qədər peşəkar, hərbi biliyə malik, döyüş şəraitini və əməliyyat planını zərgər dəqiqliklə işləməyi bacaran qiymətli hərbçidir. Xatırladım ki, onlar vaxtilə bu torpaqlar uğrunda rəşadətlə döyüşsələr də sonradan hamısı bizimkilərin başının alverə qarışdığını görərək burdan baş götürüb getmişdilər. Əgər bu hakimiyyət birinci Qarabağ savaşında mətanət göstərmiş həmin hərbçiləri bura ikinci Qarabağ savaşına görə gətiribsə, alqışlanmalıdır, yox əgər alverə, ordudaxili intriqalarda alət kimi istifadə etmək üçün  gətiriblərsə onlar elə gəldikləri kimi yenə də çıxıb gedəcəklər.

-Birinci Qarabağ savaşında Sizinlə çiyin-çiyinə döyüşmüş, sonradan bəlli səbəblərdən baş götürüb Rusiyaya qaçmış 10 minlərlə döyüşçü bu gün həmin ölkədə məhrumiyyətlərə düçar edilib. Hər halda onların başına gələnlərdən məlumatlısınız.

-Ordakı soydaşlarımıza göstərilən amansızlıq və bizim hakimiyyətin buna ögey münasibəti adama çox yer eləyir. Heç bir millətin başına açılmayan oyun Rusiyada azərbaycanlıların başına gətirilir. Tək Orxan Zeynalov məsələsi deyil ki. İllərdi buna oxşar olaylar demək olar ki, hər  gün yaşanıb, amma səsin çıxaran olmayıb.

-Siz də daxili işlər naziri olmusunuz. Heç nə vaxtsa kabinetinizə ağır cinayət törətmiş şəxsi gətiriblərmi?

-Axı buna nə ehtiyac var? Nazir həmin cinayətkarın sifətinə baxmalıdırmı? Bunun üçün qanun və cəza var. Tam məsuliyyətlə deyirəm ki, nazir işlədiyim dövr nə qədər qanlı-qadalı olsa və cinayətkarlar bizə rahatlıq verməsə də heç vaxt heç bir cinayətkarı kabinetimə gətirtməmişəm. Orxan Zeynalovu Rusiya daxili işlər nazirinin kabinetinə gətirib alçaltmaq da sadəcə “pokazuxa” idi və bununla bütün azərbaycanlıları alçaltmaq istədilər və buna nail oldular. Bununla biz azərbaycanlılara qarşı nə qədər patoloji nifrət bəslədiklərini çılpaqlığıyla ortaya qoydular.