"Axios" portalının məlumatına görə, iyulun 14-də Ağ Evdə ABŞ prezidenti Donald Trampın rəhbərliyi ilə operativ müşavirə keçirilib.
Bizim.Media xəbər verir ki, müzakirələrin əsas mövzusu İran ərazisinə qarşı, hazırda Hörmüz boğazı regionunda həyata keçirilən hərbi əməliyyatlardan daha genişmiqyaslı bir hücumun təşkil edilməsi olub.
İclasda ABŞ-ın vitse-prezidenti Cey Di Vens, dövlət katibi Marko Rubio və müdafiə naziri Pit Xeqset iştirak ediblər.
Müzakirələrin əsas məqsədi İranın hərbi imkanlarını (xüsusilə dəniz, raket və dron qabiliyyətlərini) daha geniş spektrdə zəiflətmək üçün hərbi zərbələrin miqyasını artırmaq planlarını hazırlamaq olub.
Bu iclas ABŞ və İran arasında hərbi gərginliyin artdığı və tərəflərin bir-birinə qarşı intensiv zərbələr endirdiyi bir dövrə təsadüf edir.
Xatırladaq ki, iyulun 8-də Vaşinqton və Tehran arasında əvvəlki atəşkəs razılaşması pozulub və ABŞ İran limanlarına qarşı dəniz blokadasını yenidən tətbiq edib.
Son məlumatlara görə, ABŞ hərbi qüvvələri artıq üç gündür ki, İrandakı müxtəlif hərbi hədəflərə, o cümlədən Buşehr, Çabahar, Cask və digər bölgələrdəki infrastruktur obyektlərinə qarşı ardıcıl zərbələr endirməkdədir.
Prezident Tramp isə öz açıqlamalarında Tehran danışıqlar masasına qayıtmayacağı təqdirdə, İranın kritik enerji infrastrukturu (elektrik stansiyaları və körpülər) daxil olmaqla, hədəflərin genişlənəcəyi ilə bağlı xəbərdarlıq edib.
Bizim.Media
