Bill Qeytsin keçmiş həyat yoldaşı Melinda ilə boşanma prosesi zamanı milyarder 20-dən çox nikahdankənar əlaqədə ittiham olunub. "Microsoft"un həmtəsisçisi bu barədə Qeyts Xeyriyyə Fondunun ("Gates Foundation") qapalı və kifayət qədər gərgin keçən ümumi iclasında şəxsən məlumat verib.
Bizim.Media xəbər verir ki, bu barədə "Wall Street Journal" qəzeti yazıb.
Nəşrin mənbələrinin bildirdiyinə görə, fevral ayında baş tutan görüş zamanı 70 yaşlı Qeyts məyus görünüb. O, yalnız rusiyalı qadınlarla olan iki romanını rəsmən təsdiqləyib (bu adlar Ceffri Epşteynin işi üzrə dərc olunmuş sənədlərdə keçir). Lakin 2021-ci ildəki boşanma prosesində daha 20 xəyanət iddiasının yer aldığını etiraf etməsi tabeliyində olanları şoka salıb.
Bill və Melinda Qeyts 27 il evli olublar. İclasda milyarder növbəti dəfə ictimaiyyətdən üzr istəyib, lakin pedofiliyaya görə məhkum edilmiş mərhum maliyyəçi Ceffri Epşteynlə görüşləri zamanı "heç bir qanunsuz hərəkətə yol vermədiyini" vurğulayıb.
İttihamların əksəriyyətinin təfərrüatları məxfi qalsa da, Qeyts iki qadınla — Mila Antonova və özünün "TerraPower" enerji şirkətinin keçmiş əməkdaşı ilə intim əlaqədə olduğunu açıq şəkildə etiraf edib.
Mila Antonova: Qeyts onunla 2010-cu ildə turnirdə tanış olub. Sonradan Antonova bric məktəbi açmaq üçün sponsor axtarışına çıxıb və Ceffri Epşteynlə əlaqə yaradıb.
Epşteyn onun proqramlaşdırma məktəbindəki təhsilini maliyyələşdirib. İstintaqın versiyasına görə, o, sonradan bu əlaqə barədə məlumatlardan "Microsoft"un həmtəsisçisinə təzyiq göstərmək üçün istifadə edib.
İkinci qadın: Onun adı açıqlanmır. İş materiallarında o, Qeytslə "işgüzar fəaliyyət çərçivəsində" tanış olan "rusiyalı nüvə fizikası mütəxəssisi" kimi qeyd olunub. O, təxminən iki il Qeytsin "TerraPower" şirkətində çalışıb.
İclasda narahat olan əməkdaşları sakitləşdirməyə çalışan fond rəhbərliyi qadının əslində ana şirkətdə qeydiyyatda olduğunu bildirib ki, bu da personalın daha da çaşqınlığına səbəb olub.
Epşteynin 2013-cü ildə Boris Nikoliçlə (Qeytsin elm və texnologiya üzrə o dövrdəki baş müşaviri) şəxsi yazışmalarından məlum olur ki, qalmaqallı maliyyəçi Qeytsin sevgi macəralarından xəbər tutub və İT maqnatını şantaj etməyə çalışıb.
Həmin məktublarda Nikoliçin Qeytsə "rus qızları ilə intim əlaqələrin fəsadlarını aradan qaldırmaq üçün" gizli şəkildə reseptli dərmanlar almağa kömək etdiyinə dair eyhamlar yer alıb.
Boris Nikoliç bu şübhələri qəti şəkildə təkzib edərək bildirib ki, sözügedən elektron məktublar heç vaxt Qeytsin adından və ya onun tapşırığı ilə yazılmayıb.
Bill Qeytsin rəsmi nümayəndəsi isə milyarderin cinsi yolla yoluxan xəstəliklərdən müalicə olunmasına dair hər hansı bir eyhamı "tamamilə absurd və uydurma" adlandırıb.
Korporativ iclasın sonunda Bill Qeyts Epşteynlə Nyu-York, Almaniya, Fransa və Vaşinqtonda dəfələrlə görüşdüyünü və vaxt keçirdiyini etiraf etsə də, onun Karib dənizindəki məşhur şəxsi adası olan Littl-Sent-Ceymsə getdiyinə dair şayiələri qəti şəkildə rədd edib.
Bizim.Media
