Malta Prezidenti Reza Deqatinin Xocalı soyqırımı ilə bağlı fotosərgisini ziyarət etdi - FOTO

 Maltada keçirilən Biennale çərçivəsində azərbaycanəsilli dünyaca məşhur fotoqraf Reza Deqatinin "Səssizlərin səsi" adlı foto sərgisi böyük maraqla qarşılanıb.

Bizim.Media xəbər verir ki, fotoqrafın sözlərinə görə, Malta Respublikasının Prezidenti Miriam Spiteri Debono sərgini şəxsən ziyarət edib.

Tədbirdə, həmçinin Malta Biennalesinin direktoru, Malta İncəsənət Şurasının rəhbəri və media nümayəndələri də iştirak ediblər.
 

Reza Deqati bildirib ki, Vallettanın tarixi mərkəzində təşkil olunan sərgidə Xocalı həqiqətlərini dünyanın 400-dən çox incəsənət xadimi və iştirakçısına təqdim etmək onun üçün böyük şərəf olub.

Fotoqraf qeyd edib ki, Avropa və Amerikada keçirdiyi sərgilər, konfranslar və görüşlər Azərbaycanın həqiqətlərinin beynəlxalq ictimaiyyətə çatdırılması istiqamətində mühüm addımlardır.

Onun sözlərinə görə, Xocalı faciəsinin belə nüfuzlu beynəlxalq platformada təqdim olunması və böyük ehtiramla qarşılanması həyatının ən qürurverici anlarından biri olub.