Qəbələ Uşaq Reabilitasiya Mərkəzinə yerləşdirilən Ukraynalı uşaqlar və onların qrup rəhbərləri bu gün Qəbələ Dövlət Tarix-Bədii Qoruğu və Qəbələ Arxeoloji Mərkəzinə səfər edib, tariximizlə yaxından tanış olublar.
Bizim.Media-nın yerli bürosu xəbər verir ki, Qəbələ Arxeoloji Mərkəzinin sərgi salonuna baxış keçirən qonaqlara Qoruğun ekskursiyaçıları tərəfindən qoruq ərazisində aparılan arxeoloji qazıntılar zamanı aşkar olunan tarixi, maddi və mədəniyyət nümunələri barədə geniş məlumat verilib.
Qeyd olunub ki, Qəbələ Dövlət Tarix-Bədii Qoruğu ərazisində dövrü olaraq aparılan arxeoloji qazıntılar zamanı aşkar olunan maddi-mədəniyyət nümunələri Arxeoloji Mərkəzin laboratoriyasında müvafiq tədqiq olunduqdan sonra sərgi salonunda turistlər üçün nümayiş olunur.
Daha sonra qonaqlar Qəbələ Arxeoloji Mərkəzinin akt zalına dəvət olunub və onlara Mərkəz haqqında geniş məlumat verilib.
Ukraynalı qonaqlar həmçinin Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin tabeliyində fəaliyyət göstərən Qəbələ Dövlət Tarix-Bədii Qoruğunun tarixi məkanları olan “Qala” və “Səlbir” adlanan arxeoloji ərazilərə səfər ediblər.
Burada onlara dövrü olaraq aparılmış arxeoloji qazıntılar, yerli və xarici arxeoloqlar tərəfindən aşkar edilmiş maddi-mədəniyyət nümunələri olan ictimai bina qalıqları, təsərrüfat quyuları, ocaq yerləri, su xətləri və tarixi tapıntılar haqqında geniş məlumatlar verilib, öz möhtəşəmliyi ilə tarixi sınaqlardan bu günümüzədək gəlib çıxan qala divarlarına yaxından baxış keçiriblər.
Tural Rasimoğlu, Bizim.Media, Şimal-Qərb bürosu
