Türkiyə Ermənistana təşəkkür etdi

Türkiyənin Ermənistan-Türkiyə münasibətlərinin normallaşması prosesi çərçivəsində Ermənistanla danışıqlar üzrə xüsusi nümayəndəsi Serdar Kılıç erməni həmkarı, Ermənistan parlamentinin vitse-spikeri Ruben Rubinyana “səmimi başsağlığı sözlərinə görə” təşəkkür edib.

Bizim.Media xəbər verir ki, türk diplomat bu barədə Twitter-də yazıb.

“Səmimi və çox dəyərli başsağlığı sözlərinizə görə təşəkkür edirəm, hörmətli cənab vitse-spiker. Bu addımınız xoş qarşılandı”, – deyə o vurğulayıb.

Xatırladaq ki, Ruben Rubinyan Twitter səhifəsində həftə sonu Türkiyədə baş verən avtomobil qəzalarında qeydə alınan ölüm faktlarına görə Serdar Kılıç və Türkiyə Xarici İşlər Nazirliyinə başsağlığı verib.
Ötən həftənin əvvəlində Türkiyə səfiri Ruben Rubinyana və Ermənistan Xarici İşlər Nazirliyinə İrəvandakı Surmalu ticarət mərkəzində azı 16 nəfərin ölümü, 2 nəfərin itkin düşməsinə səbəb olan partlayışla bağlı başsağlığı ünvanlayıb.

Bizim.Media